Home / Հայաստան / Ադրբեջանցի լրագրողին անկարգությունները չլուսաբանելու դիմաց կաշառք են առաջարկել

Ադրբեջանցի լրագրողին անկարգությունները չլուսաբանելու դիմաց կաշառք են առաջարկել

Ադրբեջանցի լրագրող Էլչին Իսմայիլին պդնում է, որ իշխանություններն իր վրա ճնշումներ են գործադրել՝ պահանջելով չլուսաբանել հունվարի 23-24-ին Իսմայիլի քաղաքում տեղի ունեցած բողոքի ցույցերը: Այս մասին հաղորդում է «Ազադլիղ» ռադիոկայանը:

Էլչին Իսմայիլին աշխատում է «Ազադլիղ» թերթում, նա այն քիչ լրագրողներից մեկն է, ով լուսաբանել է այն, ինչ իրականում կատարվել է Իսմայիլիում:

Լրագրողի խոսքով՝ սկզբում իրեն կաշառք են առաջարկել, հետո սպառնացել են, որ կձերբակալեն:

«Ինձ կաշառք էին առաջարկում, ասում էին՝ պարզապես կանգնիր հեռվում և հետևիր, թե ինչ է տեղի ունենում, մի գրիր և տեղակատվություն մի տարածիր սոցիալական ցանցերում», – նշել է լրագրողը:

Նրա խոսքով՝ սպառնալիքները շարունակվել են մինչև փետրվարի 4-ը, որից հետո ձերբակալվել է իր եղբայրը՝ Էլշանը:

«Իմ ձերբակալությունը կարող էր ուշադրություն գրավել, որովհետև ես լրագրող եմ, և նրանք փոխարենը իմ եղբորը ձերբակալեցին: Կարծում եմ՝ դա կապված է իմ գործունեության հետ: Այժմ ճնշումները դադարել են, նրանց կարծիքով՝ ինձ լռեցրեցին», – ասել է լրագրողը:

Էլշանին մեղադրում են զանգվածային անկարգություններ հրահրելու մեջ: Իսմայլի քաղաքի ոստիկանության պետ Նիզամի Խոջաևը հերքել է, թե Էլշանի ձերբակալությունը կապված է եղբոր լրագրողական գործունեության հետ:

«Նման բան չկա: Արդյո՞ք նա մեծ ֆիգուր է: Լրագրողն ինքն է հորինում այդ ամենը», – ասել է ոստիկանը:

Այնուամենայնիվ, տղաների հայրը՝ Սալման Իսմայիլին, պնդում է, որ իր ընտանիքի վրա ճնշում է գործադրվում որդու գործունեության համար: