Ընտրությունների օրը կնիքներն անձնագրերից արագ չեն անհետանա, խոստանում է ԿԸՀ նախագահը

Կենտրոնական ընտրական հանձնաժողովը (ԿԸՀ) այսօր փորձարկել է թանաքանյութերը, որոնցով կնքվելու են ընտրողների անձնագրերը:

Խորհրդարանական ընտրություններին մեծ աղմուկ բարձրացրած ցնդող թանաքը դարձյալ նույն անգլիական ընկերությունն է արտադրել, բայց ինչպես վստահեցրել է ԿԸՀ-ի նախագահ Տիգրան Մուկուչյանը, արվել է ամեն ինչ, որ այս անգամ առնվազն 12 ժամ կնիքը չանհետանա անձնագրից:

«Բնական է, հաշվի առնելով նախորդ ընտրությունների ժամանակ նկատված թերությունները կապված թանաքանյութի շուտ անհետացման հետ, հսկայական աշխատանք է կատարվել այն կազմակերպության կողմից, որը արտադրում է թանաքանյութ` նպատակ ունենալով բարելավել թանաքանյութի որակը: Եղան նույնիսկ տարաբնույթ գնահատականներ ու շահարկումներ, որ ցուցադրվել է մի բան, տրամադրվել է այն բան: Այս անգամ մենք փորձեցինք առավելագույնս թափանցիկ իրականացնել այս ամբողջ գործընթացը», – հայտարարել է Մուկուչյանը:

«Ազատություն» ռադիոկայանի փոխանցմամբ՝ հանձնաժողովի անդամները այսօր, ինչպես ուղեցույցում է նշված, յոթ րոպե խառնեցին թանաքանյութը, ապա անվավեր անձնագրերի վրա տասնյակ դրոշմակնիքներ դրեցին: ԿԸՀ-ի նախագահը հրավիրեց վաղը գալ ստուգելու` երաշխավորելով, որ կնիքները դեռ ցնդած չեն լինի:

«Երաշխիքը հենց այս ցուցադրումն էր, որ մենք կազմակերպեցինք: Բոլորը տեսան, կարծում եմ, համոզվեցին եւ բացի դրանից հունվարի 28-ից սկսած ընթանում են դասընթացներ: Դասընթացների հենց առաջին օրվանից այս թանաքանյութը փորձարկվում է տեղամասային ընտրական հանձնաժողովի անդամների կողմից եւ մինչ օրս այդ անձանից չկա որեւէ ահազանգ, որ որեւէ տեղ թանաքանյութի հատկանիշների` շուտ անհետացման  հետ կապված խնդիր է առաջացել», – ասել է Մուկուչյանը:

Հանձնաժողովի անդամները թանաքանյութը թափահարելը և դրոշմակնիք դնելը որպես առանձին առարկա են սովորել, ինչը, ըստ Մուկուչյանի, գրեթե բացառում է, որ մարդկային գործոնի հետեւանքով խնդիրներ կառաջանան:

«Իսկ եթե մտածում են` ինչ-ինչ սուբյեկտիվ գործոնների մասին, այդ դեպքում մենք գործ ունենք սովորական իրավախախտման հետ, որի պարագայում, բնական է, արդեն կլինեն որոշակի հետևանքներ», – ասել է Մուկուչյանը:

Թանաքանյութն արտադրող ընկերությունը, ԿԸՀ նախագահի խոսքով, այս անգամ հաշվի է առել նույնիսկ Հայաստանի եղանակային առանձնահատկությունները: Խորհրդարանական ընտրություններին որոշ տեղամասերում բարձր ջերմաստիճանով էին պատճառաբանում թանաքի արագ ցնդելը:

Հիշեցնենք, որ մայիսի 6-ին կայացած խորհրդարանբական ընտրությունների օրը անձնագրերից կնիքների օքսիդացման թեման ակտիվորեն քննարկվում էր ԶԼՄ-ներում և  սոցիալական ցանցում: Paron Bin օգտատերը պաստառ էր տեղադրել, որի վրա պատկերված էր ԿԸՀ նախագահը՝ ԿԸՀ-ի տրամադրած կնիքը ճակատին: