Ժողովուրդն ինքը միասնական թեկնածու ձևավորեց. պատգամավորները՝ ընտությունների մասին

Փետրվարի 18-ին կայացած նախագահական ընտրությունները բացահայտեցին բռնապետության դեմքը: Այս մասին այսօր ԱԺ-ում հայտարարությունների ժամին հայտարարել է ՀԱԿ խմբակցության ղեկավար Լևոն Զուրաբյանը:

Նրա խոսքով՝ ընտրություններն ի սկբանե կեղծված էին, և դրա պատճառն այն է, որ իշխանությունը ժամանակին մերժեց ընտրական համակարգի բարեփոխման փաթեթը:

Զուրաբյանը նշել է, որ ընտրությունների ցասումն ու ընդզվման ալիքը բնական է, և մի օր իշխանությունները կդառնան ժողովրդի ցասման զոհ, քանի որ, կեղծելով, երկար կառավարել չեն կարողանա:

ՀԱԿ խմբակցության ղեկավարը իշխանություններին կոչ է արել գործել, զիջել ժողովրդի պահանջներին՝ Հայաստանը հորձանուտից դուրս բերելու համար:

Ստեղծված իրավիճակից ելքը Զուրաբյանը տեսնում է արտահերթ նախագահական և խորհրդարանական ընտրություններ անցկացնելու մեջ:

ՀԱԿ խմբակցության պատգամավոր, ՀԺԿ-ի ղեկավար Ստեփան Դեմիրճյանն էլ իր ելույթում ասել է, որ փետրվարի 18-ին ժողովուրդն ապացուցեց, որ պատրաստ չէ ապրել նվաստացածի կարգավիճակով և որ ՀԺԿ-ն միշտ լինելու է ժողովրդի կողքին:

ՀՅԴ խմբակցության պատգամավոր Արմեն Ռուստամյանը, ով մասնակցել էր փետրվարի 22-ին Րաֆֆի Հովհաննիսյանի հրավիրած հանրահավաքին, այսօր ԱԺ-ում հայտարարել է, որ ընտրությունները, ինչպես սպասվում էր, վատն էին, իսկ արդյունքերը՝ կանխորոշված:

«Աբսուրդ է, թե ինչու ընտրված մարզպետը պետք է հրաժարական տա», – ասել է Ռուստամյանը ու նշել, որ եթե պատճառը տվյալ համայնքներում տիրող իրավիճակն է, ապա ինչու այդ մարդիկ հրաժարական տվեցին հիմա: Իսկ եթե ընտրությունների արդյունքն է պատճառը, ապա ակնհայտ է, որ նրանց հրաժարականը կապված է հենց այդ արդյունքների հետ:

Ռուստամյանի խոսքով՝ այս ընտրությունների առանձնահատկությունն այն էր, որ  իշխանությունների համար անակնկալ կերպով ընդդիմադիր զանգվածը ինքնակազմակերպվեց, ու ինքնաբերաբար ձևավորվեց միասնական թեկնածու:

ՀՅԴ-ական պատգամավորը նշել է, որ իրենք պատրաստ են լծվել ընդհանուր գործին և բոլոր շահագրգիռ կողմերի հետ համատեղ լուծումներ գտնել: