«Մեկնաբանություններն ավելորդ են». ՀՀ քաղաքացին գրել է Գեղարքունիքի մարզում ընտրությունների մասին

ՀՀ քաղաքացիների գերակշիռ մեծամասնությունը փետրվարի 18-ին մեկ անգամ ևս համոզվեց, որ ընտրությունների միջոցով մեր երկրում առայժմ հնարավոր չէ փոփոխությունների հասնել: Այս մասին նշված է քաղաքացիական ակտիվիստ Լևոն Գոլաստյանի «Ինչպես կեղծվեցին նախագահական ընտրություններ, մաս առաջին՝ Գեղարքունիքի մարզ» հոդվածում, որը Գալստյանը ԶԼՄ-ներին ուղարկվել է մարտի 3-ին: Հոդվածի հեղինակը խնդրում է իրեն ներկայացնել որպես ՀՀ քաղաքացի:

«Բոլորիս պարզ է, որ  2013 թ. նախագահական ընտրությունների ընթացքում համատարած օգտագործվել է վարչական ռեսուրսը, իսկ ընտրությունների արդյունքները լկտիաբար կեղծվել են: Այս ենթատեքստում շատ հետաքրքիր էր Գեղարքունիքի մարզպետ Ռաֆիկ Գրիգորյանի անկեղծացումը փետրվարի 25-ին մարզպետարանում անցկացված հերթական աշխատանքային խորհրդակցության ժամանակ, որը հրապարակվել էր մարզպետարանի պաշտոնական կայքում: Այնտեղ մասնավորապես նշված էր հետևյալը. «Խորհրդակցության ընթացքում Գեղարքունիքի մարզպետը խոսել է նաև փետրվարի 18-ին հանրապետությունում կայացած ՀՀ նախագահական ընտրությունների մասին, մասնավորապես անդրադառնալով մարզում ՀՀ նախագահ, նախագահի թեկնածու Սերժ Սարգսյանին տված բարձր քվեներին: Ռաֆիկ Գրիգորյանը շնորհակալություն է հայտնել մարզպետարանի աշխատակազմին, մարզի համայնքների, հիմնարկ ձեռնարկությունների ղեկավարներին և այլոց, ովքեր աշխատել և ճիշտ կողմնորոշում են ցուցաբերել ընտրությունների ընթացքում՝ ապահովելով նման ցուցանիշ»:  Այս հրապարակումը փաստորեն կարելի է համարել հաղորդում հանցագործության մասին՝ այն էլ խմբակային հանցագործության», – գրում է Լևոն Գալստյանը:

Նա ընդգծում է, որ արդեն փետրվարի 28-ին այդ հրապարակումը հանված է եղել մարզպետարանի կայքից, իսկ ինքը հասցրել է անել էլեկտրոնային կրկնօրինակը:

Գեղարքունիքի մարզպետարանի աշխատակազմը հանդես է եկել պարզաբանմամբ, որում, մասնավորապես, նշված է. «Սակայն մարզպետարանի աշխատակազմի տեղեկատվության և հասարակայնության հետ կապերի բաժնի կողմից սխալ է ներկայացվել Գեղարքունիքի մարզպետ Ռաֆիկ Գրիգորյանի կողմից անցկացրած խորհրդակցության բովանդակությունը, որի համար էլ  ստորաբաժանման աշխատակիցը ենթարկվել է կարգապահական տույժի՝ (խիստ նկատողություն)»:

«Ցավոք սրտի Գեղարքունիքի (և ոչ միայն) մարզպետարանում դեռևս չեն հասկացել, որ փաստերն ու թվերն անողոք են, և դրանցից ոչ մի տեղ չես կարող փախչել, կամ էլ ինչ որ ձև պարզաբանել:

Անցնենք թվերին: Գեղարքունիքի մարզում ընտրություններին մասնակցել են ընտրողների 69,12%-ը կամ 128 881 ընտրող, որոնց 78,23%-ը՝ այսինքն 100 833-ը, իրենց ձայնը տվել են Սերժ Սարգսյանին: Մարզպետարանի կայքի հրապարակումից հասկանալի է, թե ինչպես են ապահովվել հանրապետական միջինից մոտ 10% ավելի մասնակցությունն ու Սերժ Սարգսյանին տրված ձայների հանրապետական միջինից (58.64%) մոտ 20%-ով ավելի ձայները, չնայած առանց այդ էլ բոլորը լավ հասկանում են, թե այդ ամենը ինչպես է իրականացվել: Ստորև ներկայացված աղյուսակի տվյալներից ակնհայտ է դառնում, թե ինչպես են «նկարվել» թվերը Գեղարքունիքի մարզի բազմաթիվ համայնքներում: Մինչև 200 ընտրող ունեցող համայնքների տվյալները չեմ ընդգրկել աղյուսակում, քանի որ այդ բոլոր համայնքներում Սերժ Սարգսյանը հավաքել է 100 %-ին մոտ ձայներ (տվյալները վերցված են ԿԸՀ-ի պաշտոնական կայքից).

Համայնքը	Մասնակիցների քանակը և տոկոսը	Ս. Սարգսյանի հավաքած ձայների քանակը և տոկոսը
Ճամբարակ	4798 – 85,9 %	4539 – 94,6 %
Վարդենիս	7063 – 70,2 %	5874 – 83,2 %
Ախպրաձոր	172 – 77,1 %	160 – 93,1 %
Աղբերք	202 – 93,9 %	199 – 98,5 %
Այգուտ	515 – 77,9 %	502 – 97,5 %
Աստղաձոր	2184 – 75,3 %	1740 – 79,7 %
Ավազան	135 – 78,1 %	131 – 97,1 %
Արծվանիստ	1525 – 71,6 %	1226 – 80,4 %
Արտանիշ	413 – 95,2 %	410 – 99,3 %
Արփունք	292 – 86,4 %	273 – 93,5 %
Գանձակ	2368 – 70,9 %	2160 – 91,2 %
Գեղամասար	633 – 86,2 %	567 – 89,6 %
Գեղամավան	967 – 73,4 %	912 – 94,3 %
Դպրաբակ	325 – 81,3 %	309 – 95,1 %
Դրախտիկ	659 – 92,8 %	626 – 95 %
Երանոս	2160 – 58,5 %	1917 – 88,7 %
Զոլաքար	3458 – 72,1 %	2916 – 84,3 %
Ծովասար	1336 – 69,1 %	1174 – 87,9 %
Թթուջուր	628 – 77,6 %	561 – 89,3 %
Լանջաղբյուր	1390 – 78,6 %	1287 – 92,6 %
Ծակքար	1235 – 63,4 %	1010 – 81,8 %
Ծովագյուղ	2336 – 78,6 %	1897 – 81,2 %
Ծովակ	1513 – 77,7 %	1472 – 97,3 %
Ծովինար	2340 – 70,5 %	2045 – 87,4 %
Կարճաղբյուր	1532 – 83,6 %	1480 – 96,6 %
Կարմիրգյուղ	3189 – 71,6 %	2770 – 86,9 %
Կութ	1281 – 98,9 %	1268 – 98,9 %
Ձորագյուղ	2387 – 76,8 %	2211 – 92,6 %
Նորատուս	2855 – 63,2 %	2413 – 84,5 %
Շորժա	367 – 90,6 %	343 – 93,5 %
Սարուխան	3926 – 66 %	2945 – 75 %
Սոթք	1189 – 82,4 %	1118 – 94 %
Վահան	777 – 91,4 %	742 – 95,5 %
Վարդաձոր	1381 – 73,7 %	1311 – 94,9 %
Վարդենիկ	4557 – 72,9 %	4056 – 89 %
Վարսեր	979 – 73,2 %	933 – 95,3 %
Փոքր Մասրիկ	385 – 71,7 %	341 – 88,6 %

Ինձ թևում է մեկնաբանություններն ավելորդ են, և դպրոցում միայն թվաբանություն սովորած մարդուն նույնիսկ պարզ է, թե ինչ է կատարվել այս համայնքներում: Չնայած կարող է գործող նախագահի նկատմամբ տածած անսահման սերն է ստիպել Հայաստանում աղքատության մակարդակով երկրորդը համարվող մարզի բնակիչներին այսպիսի «ընտրություն» կատարել: Եզրակացությունները թողնում եմ միջազգային դիտորդներին, կարկառուն ՀՀԿ-ականներին և իրավապահ մարմիններին: Մյուս մարզերին կանրադառնամ հաջորդ դիտարկման մեջ», – հոդվածը եզրափակում է ՀՀ քաղաքացի Լևոն Գալստյանը: