Home / Տեսանյութեր / Դեսպանները զորակցում են «Սիվիլիթաս» հիմնադրամին

Դեսպանները զորակցում են «Սիվիլիթաս» հիմնադրամին

Հայաստանում ԱՄՆ Դեսպան Ջոն Հեֆերնը, Գերմանիայի  դեսպան Ռայներ Մորելը, Լեհաստանի դեսպան Զդիսլավ Ռաչինսկին, Շվեյցարիա դեսպան Կոնստանտին Օբոլենսկին և Եվրամիության ներկայացուցիչ Անդրեյ Դիդենկոն իրենց զորակցությունն են հայտնում «Սիվիլիթաս» հիմնադրամին և կոչ անում Հայաստանի իշխանություններին դադարեցնել  հիմնադրամի նկատմամբ քրեական հետապնդումը: Այս մասին այսօր` մարտի 27-ին, նրանք հայտարարել են «Սիվիլիթաս» հիմնադրամում կազմակերպված մամուլի ասուլիսին, հայտնում է Civilnet.am-ը:

«Սիվիլիթասը և ՍիվիլՆեթը մեզ համար կարևոր գործընկերներ են: Նրանք չափազանց կարևոր նշանակություն ունեն նաև Հայաստանում ժողովրդավարության կայացման գործում, և հենց դրանով է պայմանավորված, որ  դեսպանատների ներկայացուցիչները սերտորեն աշխատում են Սիվիլթասի հետ»,- ասել է Հայաստանում ԱՄՆ դեսպան Ջոն Հեֆերնը՝ հավելելով, որ հիմանդրամի հետ իրականացրել են մի շարք ծրագրեր, որոնք կատարվել են նախատեսված ժամկետների և բյուջեի սահմաններում:

«Հայաստանը համապատասխան հավակնություններ ունի օրենքի գերակայության վերաբերյալ, սա էլ համապատասխան քննություն է: Սիվիլիթաս հիմնադրամին ներկայացվող մեղադրանքները պետք է հիմք ունենան: Մինչ այսօր ես իրական հիմքերի մասին տեղյակ չեմ»,- ասել է Գերմանիայի  դեսպան Ռայներ Մորելը` հավելելով, որ նմանատիպ դեպքերում Հայաստանը վնաս է հասցնում այն դրական իմիջին, որը ձևավորվում է քաղաքական զարգացումների ընթացքում որոշումներ կայացնելիս: Սիվիլիթաս հիմնադրամի տնօրեն Սալբի Ղազարյանն ընդգծել է, որ ասուլիսը հրավիրվել է հենց դեսպաններին նախաձեռնությամբ:

ՀՀ կառավարությանն առընթեր Ազգային անվտանգության ծառայությունը (ԱԱԾ), «փողերի լվացման» հատկանիշներով Սիվիլիթաս հիմնադրամին և նրա հիմնադիր Վարդան Օսկանյանին առնչվող քրեական գործ էր հարուցել 2012թ. մայիսի 25-ին:

Լուսանկարը՝ Civilnet.am