Epress.am Լուրեր Հայաստանից
Չնայած հանգամանքին, որ ԲՀԿ առաջնորդ, օլիգարխ Գագիկ Ծառուկյանն ասել էր, թե ինքը չի ցանկանում գնել «Արմավիան», այնուհանդերձ, «Հրապարակ» օրաթերթի տեղեկություններով, նրա ու Միքայել Բաղդասարովի միջև այդ առնչությամբ հանդիպումը տեղի է ունեցել Բաղդասարովի նախաձեռնությամբ, սակայն կողմերը համաձայնության չեն եկել:
Թերթը փորձել է «Արմավիա» ավիաընկերության սեփականատեր Բաղդասարովից ճշտել՝ ինչի՞ շուրջ են խոսել ինքն ու Ծառուկյանը:
«Հրապարակ»-ը գրում է, որ, պատասխանելով հեռախոսին, անչափ բարյացակամ ասել է. «Յա վաս սլուշայու» (Ես Ձեզ լսում եմ), բայց երբ իմացել է, որ լրագրող է խոսում, շատ արագ, արդեն հայերենով ասել է՝ «ես ժամանակը չունեմ», ու անջատել է հեռախոսը:
«Ժամանակ, իսկապես, գործարարը չունի, որովհետև ապրիլի 12-ին ավարտվում է «Արմավիայի» մենաշնորհը, դաշտն ազատականացվում է, ինչն էլ իր հերթին նոր հոգսեր կարող է բերել ոլորտը տևական ժամանակ տնօրինած և մեծամեծ պարտքեր կուտակած գործարարի համար: Ի դեպ, մեր հարցին ի պատասխան, ավիացիային մոտ կանգնած աղբյուրները ժխտել են Ծառուկյան-Բաղդասարով պայմանավորվածության հնարավորությունը», – եզրափակում է «Հրապարակ»-ը: