Վթարի ենթարկված Զոհրաբյանը գիտակցության է եկել, բայց վիճակը ծայրահեղ ծանր է

ԲՀԿ անդամ, ԱԺ ՀՀԿ խմբակցության նախկին պատգամավոր Զոհրաբ Զոհրաբյանը, ով գանգուղեղային տրավմա ախտորոշմամբ գտնվում է «Արմենիա» բժշկական կենտրոնի վերակենդանացման բաժանմունքում, քիչ առաջ գիտակցության է եկել, սակայն վիճակը շարունակում է մնալ ծայրահեղ ծանր: Այս մասին Еpress.am-ի հետ զրույցում ասել է ԲՀԿ նախագահ Գագիկ Ծառուկյանի մամուլի քարտուղար Իվետա Տոնոյանը:

«Այս մասին տեղեկացել ենք վերակենդանացման բաժանմունքի պատասխանատու Արա Ղազարյանից, ով նաև նշել է, որ առայժմ տեսակցությունները արգելվում են, քանի որ Զոհրաբյանը գտնվում է վերակենդանացման բաժանմունքում», – պատմել  է Տոնոյանը:

Ավելի վաղ  Զոհրաբ Զոհրաբյանի մամուլի ծառայությունը հաղորդագրություն էր տարածել, որում անդրադարձել էր մամուլի այն հրապարակումներին, թե  վթարի պատճառ կարող էր հանդիսանալ վերջին շրջանում Զոհրաբյանի ԲՀԿ-ին անդամագրվելու փաստը, ինչպես նաև քաղաքական պատվերը:

«Ոչ հերքում, ոչ հաստատում ենք: Հավելենք, որ այս պահին ոստիկանությունում նյութեր են նախապատրաստվում», – նշված է հաղորդագրոթյան մեջ:

Հիշեցնենք, որ նախկին պատգամավորն ավտովթարի է ենթարկվել ապրիլի 4-ին՝ կեսգիշերի մոտ, Հրաչյա Քոչար փողոցում:

Լուսանկարը՝ Գագիկ Շամշյանի