Epress.am Լուրեր Հայաստանից
Արդեն երկու օր է` «Բարգավաճ Հայաստան» կուսակցության ներսում բավական լարված իրավիճակ է, գրում է «Ժողովուրդ» օրաթերթը:
«Բանն այն է, որ Սերժ Սարգսյանի երդմնակալության հատուկ նիստին մասնակցել են նաև Երևանի ավագանու ընտրություններում ԲՀԿ ցուցակի երկրորդ և երրորդ հորիզոնականը զբաղեցնող Գուրգեն Արսենյանն ու Աբրամ Մանուկյանը: Ու այդ հանգամանքը դուր չի եկել ԲՀԿ ներսում շատերին», – նշում է թերթը:
«Ժողովուրդ»-ի հետ զրույցում ԲՀԿ-ականներից մեկն ասել է. «Եթե ԲՀԿ-ական գործարարները գնացել էին, դա ոչինչ, նրանք քաղաքական դեմք չեն, նրանց նույնիսկ ԲՀԿ-ական չենք համարում: Բայց Արսենյանի ու Մանուկյանի գնալն անընդունելի է, որովհետև եթե Ծառուկյանն անձամբ չի գնում ու խմբակցության անդամներին թողնում է ազատ, պետք է այդքանը հասկանային ու չգնային, մանավանդ որ խմբակցության մեծ մասը չի գնացել այդ նիստին»:
Արսենյանը, սակայն, թերթի թղթակցի հետ զրույցում հերքել է խմբակցության ներսում իրենց դեմ լարվածության մասին լուրերը: ԲՀԿ խոսնակ Տիգրան Ուրիխանյանը երեկ հայտարարել է. «Այն պատգամավորները, որոնք եղել են Մարզահամերգային համալիրում, դա արել են սեփական որոշմամբ և սեփական պատասխանատվությամբ»: