Epress.am Լուրեր Հայաստանից
Քիչ առաջ Արագածոտնի մարզի Բյուրական համայնքում ավարտվել են Օրգովի կիրճում նոր Փոքր ՀԷԿ կառուցելու շուրջ հասարակական լսումները, ինչի ավարտից հետո գյուղի բնակչությունը դուրս է եկել բողոքի ակցիայի: Այս մասին Epress.am-ի հետ զրույցում ասել է բնապահպան Ապրես Զոհրաբյանը:
«Գյուղի բնակչությունը կտրուկ դեմ է արտահայտվել ծրագրին, քանի որ վտանգվում է իրենց հողատարածությունները ջրով ապահովելու հարցը: Գյուղում մեկ Փոքր ՀԷԿ կա, հիմա էլ երկրորդն են ուզում կառուցել, ինչն էլ առաջացրել է գյուղացիների դժգոհությունը: Ըստ էության՝ գյուղն այս պահին ապստամբ վիճակի մեջ է, և գյուղացիները խմբերով զայրացած շարժվում են դեպի կառուցման վայր, որպեսզի բուլդոզերները դուրս հանեն ձորից: Ամբողջ գյուղը ոտքով հասել է ձոր, ասում են, որ հիմա այնտեղ մոտ հազար մարդ կա: Ես այս պահին Երևանից գնում եմ Բյուրական՝ իմ աչքով տեսնելու այն, ինչ կատարվում է գյուղում», – նշել է մեր զրուցակիցը:
Հիշեցնենք, որ ավելի վաղ՝ «Ժողովուրդ» օրաթերթի խմբագրություն զանգահարած քաղաքացիները նշել են, որ իրենց տեղեկություններով՝ ՀԷԿ-ի սեփականատերը ՀՀ գլխավոր դատախազ Աղվան Հովսեփյանն է և մի պարսկահայ:
Բյուրական համայնքի ղեկավար Զարզանդ Բաբայանը, սակայն, թերթի հետ զրույցում, հերքել էր, թե ՀԷԿ-ը պատկանում է Հովսեփյանին: Նա նաև ասել էր, որ ՀԷԿ-ն արդեն երկար ժամանակ է` կառուցվում է. «Արդեն երեք ՀԷԿ է կառուցվում, ու որևէ լուրջ խնդիր չկա»: