Գեղարքունիքի մարզի գյուղում ավագանու ընտրություններին մասնակցող 8 թեկնածուներից 7-ը ՀՀԿ-ական են

Մայիսի  5-ին տեղական ինքնակառավարման մարմինների ընտրություններ են նշանակված ոչ միայն Երևանում, այլև Գեղարքունիքի մարզի Դարանակ գյուղում: Այստեղ ավագանու նոր անդամներ են ընտրելու, հայտնում է «Փաստինֆո» գործակալությունը::

Համաձայն ԿԸՀ-ի պաշտոնական կայքի՝ ավագանու անդամների թափուր տեղերի  համար Դարանակ գյուղում ՀՀԿ-ն միանգամից 6 թեկնածու է առաջադրել: Առաջադրվածների ընդհանուր թիվը 8-ն է: Բացի ՀՀԿ-ի կողմից առաջադրված 6 թեկնածուներից, մյուս 2-ն ինքնաառաջադրվել են: Վերջին 2-ից մեկն, ի դեպ, դարձյալ ՀՀԿ անդամ է, մյուսը` ՕԵԿ: ՀՀԿ առաջադրած թեկնածուներից  2-ն անկուսակցական են, 4-ը` ՀՀԿ անդամ:

Դարանակում ավագանու անդամների արտահերթ ընտրություններ էին նշանակվել այն բանից հետո, երբ որոշում էր կայացվել ավագանու անդամ Մամիկոն Կարապետյանի լիազորությունները վաղաժամկետ դադարեցնելու մասին: Պատճառը. ավագանու անդամը 1 տարվա ընթացքում բացակայել էր ավագանու նիստերի կեսից, անհնարին դարձնելով նիստերի անցկացումը: Բանն այն է, որ 2011 թվականի մարտի 29-ին Դարանակում ավագանու ոչ թե 5 անդամ էր ընտրվել, ինչպես օրենքն է սահմանում, այլ` 3: Եվ դրանցից մեկի բացակայությունն անհնար էր դարձրել նիստերի անցկացումը, ուստի ՀՀ կառավարությունը համայնքում նոր ընտրություններ անցկացնելու որոշում է կայացրել: