Փողկապերով օլիգարխիան՝ կրիմինալի փոխարեն. Ինչ է խոսք տվել Սերժ Սարգսյանն իր «տերերին»

Ռեժիմի պարագլուխը ընտրություններից հետո փորձելու է ձերբազատվել կրիմինալ օլիգարխիայից` փոխարինելով այսպես ասած երիտասարդ օլիգարխիայով` փողկապերով օլիգարխիայով: Այս մասին Aravot.am-ի հետ զրույցում ասել է «Նախախորհրդարան» քաղաքացիական շարժման անդամ Ժիրայր Սեֆիլյանը՝ մեկնաբանելով ՀՀ ոստիկանապետ Վլադիմիր  Գասպարյանի «Դուք պատգամավո՞ր եք, թե՞ գողական, արա՛» արտահայտությունը:

«Սա նախօրոք որոշված ծրագիր է, որը, իմ կարծիքով, Սերժ Սարգսյանը խոսք է տվել իր տերերին, և բոլորս եկող ժամանակներում ականատես ենք լինելու, թե այս կլանը կամ այն կլանը ինչպես է զինաթափվելու,  բանտարկվելու կամ վռնդվելու և այլն և այլն: Բայց, ինչպես ասացի, ինչով որ փոխարինվելու են,  դրանով ոչ մի օգուտ չի լինելու, այսինքն  շարունակելու են մեր երկիրը կառավարել արտաքինով շատ ավելի քաղաքակիրթ մարդկանց միջոցով, բայց ըստ էության կեղեքումը շարունակվելու է: Հիմնականում  դա տեղի է ունենալու  բանկերի միջոցով, վաշխառուական մեթոդներով, որն այսօր էլ կա և շարունակվելու է: Իսկ պատկերացրած Հայաստանում  վաշխառուական բանկեր չի լինելու, վաշխառությունը արգելվելու է , տոկոսային հասկացողությունը մեր պատկերացրած երկրում, տնտեսությունում չի լինելու: Կուզեմ ասել, որ շատ պետք չէ ուրախանալ և որգևորվել այսօրվա կրիմինալին զինաթափ  անելուց: Պետք է զինափաթվեն, դա շատ լավ է, բայց արտագաղթը կանգնեցնելու իմաստով որևէ գործ չի արվում, այլ ընդհակառակը  հստակ ծրագրավորված խնդիր է դրված հայաթափել մեր երկիրը: Դա փաստ է», -ասել է Ժիրայր Սեֆիլյանը:

«Նախախորհրդարանի» անդամ Տիգրան Խզմալյանը, նրան լրացնելով, նշել է, որ ուղիղ 100 տարի առաջ Օսմանյան կայսրությունում սուլթանը տապալվեց, և հայ պատգամավորները, մտավորականները շատ ուրախ էին և համագործակցում էին երիտասարդ թուրքերի հետ, նույնը 100 տարի անց կատարվում է  Հայաստանում` 3-րդ հանրապետությունում:

«Սուլթանին կարող է տապալեն, որպեսզի նստեն երիտհայերը, և էդ երիտհայերի դեմքերը դուք արդեն տեսել եք», – ասել է Խզմալյանը:

Ժիրայր Սեֆիլյանն  էլ կարծիք է հայտնել, որ հայաթափման ծրագրի կատարողը  Տիգրան Սարգսյանն է. «Տիգրան Սարգսյանին նաև պահում են հայաթափման ծրագիրը հմտորեն կատարելու համար, իսկ Սերժ Սարգսյանին պահում են, քանի որ նա կրիմինալի հիման վրա է եկել իշխանության,  կրիմինալով է երկիրը ղեկավարել, դրանով էլ կրիմինալից պետք է ձերբազատվի այսպես ասած: Մենք ձեզ վստահեցնում ենք, որ մեր ժողովրդի հետ կանգնեցնելու ենք նրանց մտադրությունները, ինչ որ նրանք ունեն»:

Լուսանկարը՝ Aravot.am-ի