Բնապահպանները Չարլզին չհանդիպեցին. նա հեռացավ Մատենադարանի հետնամուտքից (ՖՈՏՈ)

Այսօր կեսօրից հետո քաղաքացիական ակտիվիստների մի խումբ հավաքվել էր Մատենադարանի մոտ՝ ցանկանալով հանդիպել մասնավոր այցով Երևան ժամանած Ուելսի արքայազն Չարլզի հետ:

Տեղեկանալով, որ Չարլզը Մատենադարան է այցելելու 17:00-ին, բնապահպան ակտիվիստները ևս մեկ անգամ՝ ավելի մեծ խմբով, Մատենադարանի հարթակում են հավաքվել 16:30-ին:

Ակտիվիստների հիմնական նպատակն է տեղեկացնել Չարլզին այն մասին, որ բրիտանական «Լիդիան» ընկերությունը բնապահպանական նորմերի խախտումներով է շահագործում Ամուլսարի ոսկու հանքը:

Մինչ ակտիվիստները պաստառներով կանգնած էին Մատենադարանի գլխավոր մուտքի դիմաց, Մեծ Բրիտանիայի դեսպանատան աշխատակիցները և Չարլզի այցը կազմակերպած «Երևան, իմ սեր» հիմնադրամի մամուլի խոսնակը փորձում էին նրանց համոզել իջնել հարթակից:

Պաշտոնյաների կարծիքով՝ այդպես ավելի անվտանգ կլիներ հենց իրենց՝ քաղաքացիների համար, քանի որ այլ պարագայում ոստիկանները ստիպված կլինեն հեռացնել նրանց մուտքի մոտից:
Ինչևէ, ակցիայի մասնակիցները ասել են, որ իրավունք ունեն իրենց ակցիան անցկացնել որտեղ կկամենան և հրաժարվել են ներքև իջնել:

Քիչ հետո նրանց շրջափակելու են եկել մի խումբ ոստիկաններ:

Թեև արքայազնը պետք է Մատենադարան գար ժամը 17:00-ին, բրիտանացի թագաժառանգին գլխավոր մուտքի մոտ չեն տեսել մինչև 19:30-ը: Ակտիվիստները կարծիք են հայտնել, թե նա մտել է Մատենադարան հետնամուտքից: 19,30-ի սահմաններում այդ կասկածները հիմնավոր են դարձել. արքայազնը դարձյալ հետնամուտքից դուրս է եկել և հեռացել Մատենադարանից:

Մինչ այդ ակտիվիստներին մոտեցել է Մեծ Բրիտանիայի դեսպանը և վերցրել է արքայազնին ուղղված նամակը՝ խոստանալով այն փոխանցել Չարլզին:

Դեսպանն ասել է նաև, որ արքայազնի խորհրդականը պատրաստ է հանդիպել ակտիվիստներից մի քանիսի հետ և քննարկել վերջիններիս հուզող բնապահպանական խնդիրները: