Խոշորագույն ինտերնետ-ընկերությունները հրաժարվում են լրտեսությամբ զբաղվել

Խոշորագույն համացանցային ընկերությունները նամակ են հղել Մեծ Բրիտանիայի ներքին գործերի նախարար Թերեզա Մեյին՝ տեղեկացնելով, որ իրենք հրաժարվում են համագործակցել բրիտանական իշխանությունների հետ՝ օգտատերերի վերահսկման մասին նոր նախաձեռնության շուրջ, հաղորդում է The Guardian-ը:

Հինգ խոշորագույն համացանցային ընկերությունները՝ Yahoo!-ն, Microsoft-ը, Google-ը, Facebook-ը և Twitter-ը, նախարարությանը հասցեագրված հաղորդագրության մեջ հայտնել են, որ իրենց առաջարկվող օրենսդրական փաթեթը շատ թանկ կնստի և իրենից շատ կասկածելի նախաձեռնություն է ներկայացնում:

Օրինագիծը, որը թույլ կտա հատուկ ծառայություններին վերահսկել բրիտանացի օգտատերերի համացանցային ակտիվությունը և այդպիսով կանխել հնարավոր ահաբեկչությունները, Բրիտանիայում քննարկվում էր մի քանի տարիների ընթացքում: Օրինագծի հարցը բարձրացվել է լոնդոնյան Վուլիչ թաղամասում զինծառայողի սպանությունից հետո, որը որակվել է որպես ահաբեկչություն: Ներքին գործերի նախարարությունում կարծում են, որ համցանցային շփման վերահսկման լրացուցիչ մեխանիզմները թույլ կտան կանխել նման պատահարները: Բրիտանական վարչությունում հույս էին հայտնել, որ ԱՄՆ-ում տեղակայված խոշորագույն համացանցային ընկերությունները ինքնակամ կօգնեին իշխանություններին:

Բրիտանական կառավարությունում օրինագծի հիմնական ընդդիմախոսներից է  լիբերալ-դեմոկրատների առաջնորդ Նիք Կլեգգը, ով 2013 թվականի ապրիլին հանդես է եկել օրինագծի խիստ քննադատությամբ և ազնվորեն հայտնել է իր անհամաձայնությունը ծրագրի էության հետ Մեծ Բրիտանիայի վարչապետ Դեյվիդ Քեմերոնին և ներքին գործերի նախարար Թերեզա Մեյին: