Epress.am Լուրեր Հայաստանից
SOCAR-ը (Ադրբեջանի պետական նավթային ընկերություն) պարզաբանել է ընկերության նախագահ Ռովնագ Աբդուլաևի՝ Հայաստան գազի հնարավոր մատակարարման մասին ավելի վաղ արած հայտարարությունը:
Contact.az-ը, հղում կատարելով SOCAR-ի պաշտոնական կայքին, հայտնում է, որ Հայաստան գազի մատակարարման մասին հարցը կարող է քննարկվել այդ դեպքում, եթե Հայաստանը փոխի «Ադրբեջանի օկուպացված տարածքների» վերաբերյալ իր դիրքորոշումը:
Փաստաթղթում նշվում է, որ Հայաստանը ինքնամեկուսացվել է տարածաշրջանային համագործակցությունից՝ «ընտրելով անջատողականության և ագրեսիվ ազգայնականության ճանապարհը և, օգտագործելով ագրեսիայի և օկուպացիայի քաղաքականությունը, գրավել է ադրբեջանական հողերի զգալի մասը»:
Ըստ հայտարարության հեղինակների՝ եթե Հայաստանը փոխի «օկուպացված տարածքների» նկատմամբ իր դիրքորոշումը, Ադրբեջանի տարածքային ամբողջության շրջանակներում հանդես գա հակամարտության խաղաղ ճանապարհով կարգավորման օգտին, ապա, հնարավոր է, ներգրավվի տարածաշրջանային և համաշխարհային նշանակություն ունեցող էներգետիկ նախագծերում:
Հիշեցնենք, որ հունիսի 7-ին ANS հեռուստաընկերության հետ զրույցում Ադրբեջանի պետական նավթային ընկերության նախագահը հայտնել էր Հայաստան գազի հնարավոր մատակարարման մասին:
«Եթե Հայաստանը մեզ դիմի գազի հարցում օգնության խնդրանքով, մենք անկասկած կօգնենք»,- հայտարարել էր Ռովնագ Աբդուլաևը:
Ադրբեջանական «Թուրան» տեղեկատվական գործակալության վերլուծաբանների կարծիքով՝ Աբդուլաևի հայտարարությունը կարելի է դիտարկել որպես քաղաքական, այլ ոչ թե կոմերցիոն առաջարկ: