Զինդատախազության աշխատանքային խումբը խեղկատակություն է, պնդում են զոհված զինվորների մայրերը

Այն փաստը, որ Զինդատախազությունը ուսումնասիրելու է միայն 2011թ. հունվարի 1-ից հետո ընկած ժամանակահատվածում հարուցված քրեական գործերը, ցույց է տալիս, որ այս կառույցը ոչ թե պետական, այլ մասնավոր մարմին է, որում ցանկացած անձ իբր պատասխան է տալիս միայն իր գործողության համար: Այս մասին ասված է հայկական բանակում զոհված 4 զինծառայողների ծնողների հայտարարության մեջ, որում անդրադարձ է կատարվում ՀՀ զինդատախազության հայտարարությանն այն մասին, թե ստեղծվել է աշխատանքային խումբ, որը ուսումնասիրելու ՀՀ զինված ուժերում արձանագրված մահվան ելքով քրեական գործերը:

Ըստ հայտարարության հեղինակների՝ Զինդատախազության որշումը նշանակում է, որ ՀՀ Ազգային ժողովը պետք է որոշում ընդունի, համաձայն որի անհրաժեշտ է կարճել բոլոր այն նախաքննության մեջ գտնվող սպանության փաստով հարուցված քրեական գործերը, որոնք հարուցվել են մինչև 2011թ.-ի հունվարի 1-ը, և բոլոր այն սպանված զինվորների ծնողները, որոնց երեխաներին սպանել են մինչև 2011թ.-ի հունվարի 1-ը, այսուհետ իրավունք չպետք է ունենան բողոքել իրենց որդիների սպանության գործերը կոծկելու դեմ:

«Մենք` սպանված զինվորների ծնողներս, համարում ենք, որ վերոնշյալ ուսումնասիրության նախաձեռնությունը խեղկատակություն է, ծաղր սպանված զինվորների ծնողների հանդեպ, քանի որ զինդատախազի այն հայտարարությունը, թե ինքը պատասխանատու է 2011թ.-ի հունվարի 1-ից հետո ընկած ժամանակահատվածում տեղի ունեցած դեպքերի համար, մերկապարանոց հայտարարություն է: Իրականում, եթե զինդատախազն իրոք պատասխանատվություն կրեր իր պաշտոնավարման ընթացքում տեղի ունեցած դեպքերի համար, ապա այժմ  պետք է լիներ անազատության մեջ»,- ասված է հայտարարության մեջ:

Ծնողները հայտարարում են, որ հենց Գևորգ Կոստանյանի օրոք կոծկվել են հետևյալ սպանության գործերը`

1.      Թորգոմ Սարուխանյան 2011թ. փետրվարի 12

2.      Տիգրան Համբարձումյան 2011թ. հունիսի 29

3.      Զորիկ Մարգարյան 2012թ. ապրիլի 18

4.      Աղասի Աբրահամյան 2011թ. օգոստոսի 27

5.      Ալբերտ Ադիբեկյան 2012թ. փետրվարի 23

6.      Էդվարդ Ալավերդյան 2011թ. հուլիսի 29

7.      Տիգրան Վարյան 2012թ. փետրվարի 29

Հայտարարության տարածել են Իրինա Ղազարյանը, Անահիտ Մկրտչյանը, Նանա Մուրադյանը և Գոհար Սարգսյանը: