ՀԱԿ-ը Հայաստանում իշխանափոխության համար բավարար հիմքեր է տեսնում

Վերջին շրջանում Հայաստանում բացահայտվել են պետական բյուջեի թալանման և պետական բարձրագույն ղեկավարների կոռուպցիոն գործարքների խայտառակ փաստեր, որոնք իրենց քաղաքական կշռով մի քանի անգամ բավարար են կառավարության, երկրի բարձրագույն իշխանության հրաժարականի, ընդհանրապես ամբողջական իշխանափոխության համար։ Այս մասին ասված է «Հայ Ազգային Կոնգրես» կուսակցության կողմից տարածած հայտարարության մեջ, որն ընդունվել է հուլիսի 6-ին կայացած վարչության նիստում:

«Հայ Ազգային Կոնգրեսն իր փաստաթղթերում բազմիցս նշել է, որ երկրի առաջին դեմքի կողմից ղեկավարվող կոռուպցիոն համակարգը զանազան միջոցներով թալանում է տարեկան պետական բյուջեին կրկնակի գերազանցող հարստություն։ Վերահսկիչ պալատի հաշվետվությունն ԱԺ-ում կոնկրետ փաստերով ի ցույց դրեց, որ, բացի դրանից, համակարգված ձևով թալանվում է նաև հենց պետական բյուջեն։

Վարչախումբը հերթական անգամ ամենաբարձր մակարդակով դրսևորեց իր ստախոսությունը։ Ապրիլի 1-ից սկսած գազի գնի բարձրացման մասին Կոնգրեսի հրապարակած տեղեկությունները նա կտրականապես հերքում էր 2012թ. հոկտեմբերից մինչև վերջերս, մինչդեռ պարզվեց, որ համապատասխան գործարքները իրականացվել կամ պայմանավորվածությունները ձեռք են բերվել հենց այդ շրջանում։

Անհերքելի փաստերով բացահայտվեց ՀՀ վարչապետ Տիգրան Սարգսյանի անմիջական ներգրավվածությունը օֆշորային խայտառակ գործարքներում։

Այս երեք, ավելի քան սկանդալային փաստերից որևէ մեկի առիթով իշխանությունը որևէ հիմնավոր բացատրություն չի տվել, եւ չէր էլ կարող տալ, քանի որ մենք գործ ունենք անհերքելի, իրական փաստերի հետ», – նշում է Կոնգրեսը։

Հայտարարության հեղինակներն ընդգծում են, որ մի նոր սկանդալ էր Սերժ Սարգսյանի ելույթը ՎՊ-ի հաշվետվության հետ կապված:

«Նա գերազանցում է Սահմանադրությամբ իր զբաղեցրած պաշտոնին ամրագրված լիազորությունները՝ ապօրինաբար ճնշում գործադրելով Սահամանադրության 83.4 հոդվածով անկախության երաշխիքներ ստացած Վերահսկիչ պալատի, ինչպես նաև օրենքով անկախ համարվող քննչական մարմինների վրա, ինչը ըստ էության այլ բան չէ, քան արդարադատության խոչընդոտում։

Դեռ 2011թ. նոյեմբերին Կոնգրեսը հրապարակել է «Սերժ Սարգսյանի պաշտոնանկության իրավաքաղաքական հիմքերի հռչակագիր» կոչվող փաստաթուղթը, որում նա մեղադրվում է իշխանության  յուրացման, ինչպես նաև այլ ծանր հանցագործություններ և օրինախախտումներ կատարելու մեջ։ Սերժ Սարգսյանի վերջին այս ելույթը լրացնում է նրա պաշտոնանկության իրավա-քաղաքական հիմքերի տպավորիչ այդ ցանկը։

Հայ Ազգային Կոնգրեսը շարունակելու է հետամուտ լինել վարչախմբի հանցավոր էության և գործելակերպի բացահայտմանը՝ ստեղծելու համար հասարակական ու քաղաքական այն մթնոլորտը, որը կբերի Սերժ Սարգսյանի հրաժարականի կամ պաշտոնանկության միջոցով երկրում սահմանադրական կարգի վերականգնմանը», -եզրափակում է հայտարարությունը։