Home / Հայաստան / Բաքվի կենտրոնը որոշել են «լվանալ» ակտիվիստների ակցիայի ժամանակ

Բաքվի կենտրոնը որոշել են «լվանալ» ակտիվիստների ակցիայի ժամանակ

Ֆեյսբուքում անանուն խմբի կողմից կիրակի օրը Բաքվի Շատրվանների հրապարակում նշանակված՝ ձերբակալված ադրբեջանցի ակտիվիստներին ազատ արձակել պահանջող լուռ բողոքի ակցիան լրջորեն անհանգստացրել է իրավապահ մարմիններին, հայտնում է Contact.az-ը:

Թեև ակցիան նշանակված էր ժամը 15.00-ին, արդեն կեսօրից Շատրվանների հրապարակը ոստիկանության հսկողության տակ էր: Հրապարակը հերթով հսկում էին երկու ոստիկաններ՝ ռետինե մահակներով:

Ոստիկանական մեքենաներ են նկատվել «ՄքԴոնալդս» սրճարանի, ինչպես նաև տարածքում գտնվող այգիների շրջակայքում:

Իրավապահ մարմինների աշխատակիցները, հենց նկատում էին երիտասարդների փոքր խմբեր, նրանց անմիջապես խորհուրդ էին տալիս լքել հրապարակը:

Չնայած շոգ եղանակին, քաղաքային վարչության ղեկավարությունը հանկարծ որոշել էր զբաղվել Շատրվանների հրապարակի մաքրությամբ, նշում է հրատարակությունը:

5 լվացող մեքենաներ անսպասելի հայտնվեցին հենց այն վայրում, որտեղ նախատեսված էր անցկացնել ակցիան: Հրապարակի հենց այդ հատվածում շարժվելով՝ դրանք խանգարում էին ԶԼՄ-ների ներկայացուցիչների աշխատանքին:

Երբ հրապարակում հայտնվեց մի երիտասարդ և կանգնեց հրապարակի մեջտեղում, մեքենաներից մեկը շարժվեց նրա ուղղությամբ, բայց երիտասարդը տեղից չշարժվեց: Այդ պահին քաղաքացիական հագուստով մարդիկ, բռնելով երիտասարդին, նրան հեռացրին հրապարակից:

Ոստիկաններն արգելում էին ինչ-որ մեկի նետած թռուցիկի նկարահանումը: Թռուցիկի վրա գրված էր՝ «Մի խլեք մեզանից մեր երիտասարդությունը»:

Մեկ այլ երիտասարդ նույնպես որոշեց միայնակ բողոքել՝ ձեռքերով փակելով բերանը: Սակայն նրան անմիջապես բռնեցին քաղաքացիական հագուստով մարդիկ և հեռացրին հրապարակից: Նա հասցրեց լրագրողներին ներկայանալ որպես Վուգար Ասլանով՝ «Բաց հասարակություն» կուսակցության անդամ:

Ոստիկանները փակեցին լրագրողների ճանապարհը և թույլ չտվեցին նկարահանել ձերբակալման գործընթացը:

Ընդհանուր առմամբ, տարվա սկզբից Ադրբեջանում ձերբակալվել է երիտասարդական շարժումների 9 ակտիվիստ:

Եվս 3 երիտասարդ ակտիվիստ հուլիսի 15-ին դատապարտվել է 15 օրվա վարչական կալանքի: