ՊՆ հաղորդագրությունում Արտակ Բուդաղյանի մասին ասվածը հիմարություն է. փաստաբան

Այսօր առավոտյան Պաշտպանության նախարարության տարածած հաղորդագրությունն այն մասին, թե իբր Սյունիքի նախկին մարզպետ Սուրիկ Խաչատրյանի տան մոտ տեղի ունեցած հանցագործության փաստի առիթով  գնդապետ Արտակ Բուդաղյանը հրաժարվում է ցուցմունք տալ, սուտ է և հիմարություն: Epress.am-ի հետ զրույցում նման գնահատական է հնչեցրել Բուդաղյանի փաստաբան Հայկ Ալումյանը: Նա պատմել է, որ հենց երեկ` ժամը 15.00-ից, Բուդաղյանը հարցաքննվել է, իսկ դրանից հետո իր՝ փաստաբանի և հոր՝ Էմիլ Բուդաղյանի հետ 2 ժամ՝ մինչև 20.00-ը, ծանոթացել է փորձաքննության նյութերին, 30-40 անգամ նայել տեսանյութը, ինչը նաև մեծ հոգեբանական լարվածություն է պահանջում, և իր մեկնաբանություններն է տվել: 

Ալումյանի խոսքով՝ Բուդաղյանը այդ գործողություններին մասնակցել է, չնայած այն փաստին, որ առողջական խնդիրներ ուներ՝ ջերմություն, որովայնի ցավեր, և կանչվել էր հոսպիտալ: Հարցաքննությունից հետո՝ աշխատանքային օրվա ավարտից երկու ժամ անց, քննիչ Ալեքսան Ղազարյանը ցանկացել է 5 առերեսում անել Բուդաղյանի հետ: 

«Արտակ Բուդաղյանը ոչ թե հրաժարվել է առերեսումից, այլ խնդրել է հետաձգել, քանի որ պետք է գնար հոսպիտալ: Ասել, թե նա հրաժավում է ցուցմունք տալուց, հիմարություն է»,- ասել է Ալումյանը:

Ինչ վերաբերում է ՊՆ հաղորդագրության մեկ այլ տեղեկատվությանը, թե համակարգչատեխնիկական և տեսաձայնագրային փորձաքննության եզրակացության համաձայն տեսանյութում փոփոխություններ չեն հայտնաբերվել, ապա, Ալումյանի խոսքով, դա բնական է, և դա իրենք երբեք կասկածի տակ չեն դրել:

«Մենք ասել ենք և հիմա էլ ասում ենք, որ համացանցում տեղադրված տեսանյութն է մոնտաժված: Իսկ քննիչների մոտ գտնվող տեսագրությունը համապատասխանում է իրականությանը», -ասել է Ալումյանը: 

Լուսանկարը՝ Azatutyun.am