Home / Տեսանյութեր / Գալուստ Սահակյանը «որպես ՀՀ քաղաքացի» Տիգրան Առաքելյանի դեմ ոչինչ չունի

Գալուստ Սահակյանը «որպես ՀՀ քաղաքացի» Տիգրան Առաքելյանի դեմ ոչինչ չունի

ՀՀԿ փոխնախագահ Գալուստ Սահակյանը որպես ՀՀ քաղաքացի քաղբանտարկյալ Տիգրան Առաքելյանի դեմ ոչինչ չունի և ցանկանում է, որպեսզի նա օր առաջ ազատվի: Այս մասին Սահակյանն ասել է այսօր լրագրողների հետ ճեպազրույցում: Տիգրան Առաքելյանի գործին լրագրողները խնդրել են անդրադառնալ Սուրիկ Խաչատրյանի որդու նկատմամբ հետապնդումը դադարեցնելու մասին որոշման ֆոնին:

«Նրանք, ովքեր բացասական են վերաբերվում Սուրիկ Խաչատրյանին, ասում են, թե նրա որդուն ազատ արձակելը սխալ որոշում էր, նրանք, ովքեր բարեկամական հարաբերություններ ունեն, ասում են՝ ճիշտ է: Ես իմ կարծիքը չեմ հայտնի, դա այլ մարմնի՝ դատարանի խնդիրն է»,- ասել է Սահակյանը: 

Սուրիկ Խաչատրյանի որդուն ազատ արձակելու որոշմանն անդրադարձել են նաև ԱԺ այլ խմբակցությունների ներկայացուցիչներ՝ ՀՅԴ-ական Արմեն Ռուստամյանը, ԲՀԿ-ական Վահե Հովհաննիսյանը, ՀԱԿ-ից՝ Արամ Մանուկյանը, «Ժառանգությունից»՝ Թևան Պողոսյանը, ովքեր, ի տարբերություն Սահակյանի, դատապարտել են քննիչի կայացրած որոշումը: Պատգամավորները նշել են, որ կա առգրավված անօրինական զենք, տեսանյութեր, ապացույցներ գործի մասին, ուստի քննությունը այլ ընթացք պետք է ստանար:

Նրանք նաև հիշեցրել են, որ անցնող շաբաթվա ընթացքում Վերաքննիչ դատարանը  երրորդ անգամ չի բավարարել Տիգրան Առաքելյանի խափանման միջոցը փոխելու մասին միջնորդությունը: Հիշեցնենք, որ ԱԺ 4 խմբակցություններ կոչ էին արել ազատ արձակել Տիգրան Առաքելյանին: