Պաշտոնյայի կողմից ծեծված փուչիկ վաճառողի դեպքի առիթով քրգործ չի հարուցվել

Հայաստանի տարբեր գերատեսչությունների բոլոր մանր ու միջին չինովնիկները այսուհետ անարգել, էլ ավելի «դուխով» կարող են Երևանի փողոցներում օրը ցերեկով մարդկանց ծեծի ենթարկել, գլխներին խփել, մարմնական վնասվածքներ հասցնել, գրում է «Հայկական ժամանակ» օրաթերթը:

Նշենք, որ խոսքը՝ հուլիսի 17-ին Հանրապետության հրապարակում Երևանի քաղաքապետարանի առևտրի և սպասարկումների վարչության պետ Արման Եդոյանի կողմից փուչիկ վաճառող 25-ամյա Արսեն Սաքանյանին ծեծի ենթարկելու մասին է։

Ոստիկանության հասարակայնության հետ կապերի և լրատվության վարչության աշխատակիցը երեկ թերթի թղթակցին հայտնել է, որ այդ դեպքի առիթով քրեական գործի հարուցումը մերժվել է՝ ՀՀ Քրեական դատավարության 35-րդ հոդվածի 1-ին մասի 2-րդ կետով (հանցակազմի բացակայություն): «ՀԺ»-ն հիշեցնում է, որ Արման Եդոյանի հարվածներից հետո 25-ամյա Արսենը ուշաթափվել էր, նրան տեղափոխել էին «Էրեբունի» բժշկական կենտրոն»: