Սայաթ Նովայում կառուցվող շենքը Վիգեն Սարգսյանին է պատկանում, պնդում են բողոքող բնակիչները

«Երևանի Սայաթ-Նովա 10/5 հասցեում գտնվող հին կաթսայատան տեղում բազմապրոֆիլ շենք կառուցելու նախագծի սեփականատերը, ըստ տարածքի բնակիչների, Սերժ Սարգսյանի աշխատակազմի ղեկավար Վիգեն Սարգսյանն է, գրում է «Հայկական ժամանակ» օրաթերթը:

Թերթը նշում է, որ արդեն մի քանի ամիս է տարածքի բնակիչները ոտքի են կանգնել և պայքարում են իրենց իրավունքների ոտնահարմամբ կառուցվող հյուրանոցի դեմ՝ այս ընթացքում ենթարկվելով կարմիրբերետավորների կողմից ահաբեկումների, թաղային խուլիգանների կողմից սպառնալիքների, ոստիկանության հետ քաշքշոցների։

Նրանց անհեթեթ հարցաքննությունների պատրվակով շարունակ հրավիրվում են ոստիկանություն։

«Բնակիչներն այլևս վստահ են, որ այս ամենը հրահանգավորվում է Բաղրամյան 26-ից։ Նրանք նաև սեփականատիրոջ անձով են պայմանավորում անհայտ կառուցապատող «Լարկո գրուպ» ընկերության դեմ Երևանի քաղաքապետի, Կենտրոնի թաղապետի, գործին միջամտող ԱԺ պատգամավորի և այլ չինովնիկների անզորությունը, ինչպես նաև տասնյակ քաղաքացիների դիմումի հանդեպ Սերժ Սարգսյանի անտարբերությունը։ Բնակիչները նաև սպառնում են՝ եթե Վիգեն Սարգսյանը հետ չկանգնի նախագիծն իրականացնելու գաղափարից, ապա իրենք հետաքրքիր պատմություններ կհրապարակեն թեմայի շրջանակներում», – գրում է թերթը: