Հյուսիսային պողոտայում վերանորոգումից հետո առևտրահասարակական գոտի է գործելու

Հյուսիսային պողոտայում մեկնարկած վերանորոգումից հետո նոր ստորգետնյա հատվածում առևտրահասարակական գոտի է գործելու, գրում է «Հայկական ժամանակը»՝ նշելով, որ այդ մասին վկայող պաստառ է փակցված պողոտայի այն մասում, որտեղ արդեն շինարարություն է ընթանում։

Հոկտեմբերին Երևանի գլխավոր ճարտարապետ Տիգրան Բարսեղյանը թերթին հայտնել էր, որ Հյուսիսային պողոտայի վերանորոգման համալիր ծրագիրը կֆինանսավորի «Տաշիր գրուպ» ընկերությունը։ Իսկ ավելի վաղ՝ մայիսի 4-ին, «ՀԺ»-ն գրել էր այն մասին, որ պողոտայի ստորգետնյա ավտոկայանատեղիներում թիվ 8 և 10 շենքերի տակ, «Տաշիր գրուպ»-ը «բուտիկներ» է կառուցելու։

«Հիմա պարզ է դառնում, թե ինչպես է ստացվել, որ գործարար Սամվել Կարապետյանի ընկերությունը հանձն է առել ֆինանսավորել Հյուսիսային պողոտայի վերանորոգման ծրագիրը»,- գրում է թերթը:

Հյուսիսային պողոտա 8 և 10 շենքերի բնակիչներն իրենց անհամաձայնությունն են հայտնել այս նախագծին՝ մատնանշելով դրա հետ կապված մի շարք գործոններ ու ռիսկեր։

Մասնավորապես՝ ապագա «բուտիկների» տարածքը մասն է կազմում հանրային կայանատեղիի, գետնի տակ հակահրդեհային անվտանգության համակարգ չկա, առաստաղը ցածր է, խանութների համար չհարմարեցված։ Հյուսիսային պողոտայի համալիր վերակառուցման շինարարության ավարտը նախատեսված է 2014թ. մարտի 4-ին։ Նախագծի ճարտարապետներն են Նարեկ Սարգսյանը և Աշոտ Ալեքսանյանը։ Շինարարությունն իրականացնում է Սամվել Կարապետյանին պատկանող «Դալմա Շին» ԱՊԸ-ն»։

Հոդվածն ամբողջությամբ՝ թերթի այսօրվա համարում