Եվրադատարանը քննում է հայ և ադրբեջանցի փախստականների հայցերը

Ստրասբուրգում` Մարդու իրավունքների եվրոպական դատարանի Մեծ պալատում, չորեքշաբթի սկսվել է Հայաստանի դեմ ադրբեջանցի տեղահանվածների հայցի քննությունը:

«Ազատություն» ռադիոկայանի կայքը՝ հղում կատարելով ադրբեջանական APA լրատվական գործակալությանը, փոխանցում է, որ Ադրբեջանի վեց քաղաքացիների՝ Լաչինի շրջանի նախկին բնակիչների գանգատը Եվրադատարանում ստացվել է 2005 թվականին: Հայցվորները պնդում են, որ 1992 թվականի մայիսի 17-ին բռնությամբ վտարվել են իրենց տներից, իրենց ամբողջ ունեցվածքը ընկել է հայերի ձեռքը, և քանի որ չեն կարող վերադառնալ Լաչին՝ փոխհատուցում են պահանջում Հայաստանի իշխանություններից: Վեց ադրբեջանցիները պնդում են նաև, թե ազգային խտրականության են ենթարկվել:

Այսօր դատական նիստի ժամանակ հայկական կողմի փաստաբանները անհամաձայնություն են հայտնել այն կապակցությամբ, որ հայցում որպես պատասխանող կողմ ներկայացված է Հայաստան պետությունը: Նրանք ընդգծել են, որ թեև Լեռնային Ղարաբաղը ճանաչված պետություն չէ, այն ունի պետական կառուցվածք, դատական համակարգ, և հետևաբար՝ հայցը պետք է ներկայացվեր Լեռնային Ղարաբաղին:

Ադրբեջանական կողմի փաստաբանները, իրենց հերթին, հայտարարել են, թե Լեռնային Ղարաբաղը և հարակից տարածքները փաստացի վերահսկվում են Հայաստանի կողմից, Հայաստանը համագործակցում է «Լեռնային Ղարաբաղի անջատողական վարչակարգի» հետ:

Փաստաբանները պատասխանել են դատավորների հարցերին, և դատավարությունում ընդմիջում է հայտարարվել:

Եվրադատարանի պաշտոնական կայքէջի փոխանցմամբ՝ փետրվարի 5-ին դատարանի Մեծ պալատում սկսվելու են լսումները Ղարաբաղյան պատերազմին առնչվող մեկ այլ՝ Ադրբեջանի դեմ Շահումյանի շրջանի Գյուլիստան գյուղից բռնի տեղահանված Մինաս Սարգսյանի 2006 թվականին ներկայացրած հայցով:

2009 թվականին 80 տարեկան հասակում վախճանված Սարգսյանի հայցը Եվրադատարանում կպաշտպանեն նրա իրավահաջորդները՝ այրին և երեք զավակները: