Պատգամավորն ու ՍԴ անդամը մանիպուլյացիա են անում․ փաստաբանը՝ կուտակայինի մասին

Փաստաբան Մերի Խաչատրյանը, ով մասնակցել է կուտակային համակարգի մասին Սահմանադրական դատարանի հայցի քննությանը, համարում է, որ ԱԺ պատգամավոր Դավիթ Հարությունյանը և ՍԴ անդամ Ֆելիքս Թոխյանը մանիպուլյացիայի են ենթարկում ժողովրդին։ Նշենք, որ Հարությունյանը և Թոխյանը հայտարարել են, որ, չնայած ՍԴ հակասահմանադրական է ճանաչել Կուտակային կենսաթոշակների մասին օրենքի որոշ կետեր, այդ թվում՝ պարտադիր բաղադիչը, քաղաքացիները պետք է շարունակեն վճարներ կատարել մինչև սեպտեմբերի 30-ը։

Խաչատրյանը նշում է, որ «արդեն ցնդացրեցին ժողովրդին», ու «Ֆեյսբուք» սոցիալական ցանցի իր էջում մեջբերում է ՍԴ-ի ձևակերպումները՝ խնդրելով ուշադիր կարդալ դրանք։

«ՀՀ ՍԴ 02.04.2014թ. ՈՐՈՇՄԱՆ 6-րդ կետ՝ «Կուտակային կենսաթոշակների մասին» Հայաստանի Հանրապետության օրենքի 7-րդ հոդվածի 2-10-րդ մասերի, 8, 37, 38, 45-րդ հոդվածների, 49-րդ հոդվածի 2-րդ մասի և 86-րդ հոդվածի վեճի առարկա դրույթները համապատասխանում են ՀՀ Սահմանադրությանը՝ սույն որոշման մեջ սահմանադրական դատարանի արտահայտած իրավական դիրքորոշումների շրջանակներում՝ այն սահմանադրաիրավական բովանդակությամբ, համաձայն որի` դրանցով նախատեսված իրավակարգավորումները չեն կարող հիմքում ունենալ, մեկնաբանվել և կիրառվել մարդկանց հայեցողությունից անկախ նրանց սեփականության իրավունքի սահմանափակում ենթադրող իրավակարգավորման համատեքստում, իսկ կենսաթոշակային ֆոնդի կառավարիչների իրավունքները պետք է իրացվեն միայն համարժեք պարտավորություններով հավասարակշռման սկզբունքին համապատասխան։

ՈՐՈՇՄԱՆ 7-րդ կետ՝ 7. Հաշվի առնելով, որ «Կուտակային կենսաթոշակների մասին» ՀՀ օրենքը, մասնավորապես՝ սույն որոշման եզրափակիչ մասի 1-5 կետերով Հայաստանի Հանրապետության Սահմանադրությանը հակասող ճանաչված իրավադրույթները համակարգային առումով փոխկապակցված են Հայաստանի Հանրապետության շուրջ 50 օրենքներով և ութ տասնյակից ավելի այլ նորմատիվ իրավական ակտերով նախատեսված իրավակարգավորումների հետ, որոնց շատ դրույթներ սույն որոշման հիման վրա օրենքով սահմանված կարգով ենթակա են վերանայման, ինչպես նաև նկատի ունենալով օրենքի պահանջը՝ համակարգային առումով իրավական անվտանգությունը չխաթարելու վերաբերյալ, ՀՀ Սահմանադրության 102-րդ հոդվածի 3-րդ մասի և «Սահմանադրական դատարանի մասին» ՀՀ օրենքի 68-րդ հոդվածի 15-րդ մասի հիման վրա սույն որոշմամբ ՀՀ Սահմանադրությանը հակասող ճանաչված իրավանորմերի ուժը կորցնելու վերջնաժամկետ սահմանել 2014 թվականի սեպտեմբերի 30-ը՝ հնարավորություն տալով ՀՀ Ազգային ժողովին և ՀՀ կառավարությանը՝ իրենց իրավասության շրջանակներում «Կուտակային կենսաթոշակների մասին» ՀՀ օրենքի և դրա հետ համակարգային առումով փոխկապակցված այլ օրենքների ու նորմատիվ իրավական ակտերի իրավակարգավորումները համապատասխանեցնելու սույն որոշման պահանջներին»։

Խաչատրյանը նշում է, որ հետևություն կարելի է անել, որ 6-րդ կետը ուժի մեջ է մտնում հրապարակման պահից, քանի որ 7-րդ կետում հստակ ասվում է, որ որոշման 1-5-րդ կետերին վերաբերող մասերն են վերանայելու և համապատասխանեցնելու 30.09.2014թ. ՀՀ Սահմանադրությանը:

«Իսկ 6-րդ կետի մասը խնդրում եմ ուղղակի ժողովուրդ ջան, ձեր ցավը տանեմ մի հատ ուշադիր կարդացեք՝ միմիայն Ձեր գրավոր կամահայտնության առկայության դեպքում է կիրառվելու…ուշադիր կարդացեք, արդեն ցնորվեցի, հեռախոսս էլ հանգիստ չի տալիս, պարոն Թոխյանն ու պարոն Հարությունյանը մանիպուլյացիա են արել, մի տրվեք սադրանքների, սա ուղղակի բառիս բուն իմաստոցվ խայտառակություն է…», – գրել է Խաչատրյանը։

Լուսանկարը՝ ՍԴ-ի դեմ մարտի 28-ին անցկացված լուռ ակցիայից