Կիպրոսում հաստատվել է՝ օֆշորային փաստաթղթերի տակ Տիգրան Սարգսյանի ստորագրությունն է․ «Ժողովուրդ»

Նախկին վարչապետ Տիգրան Սարգսյանի օֆշորային սկանդալի գործով նոր փաստեր են ի հայտ եկել, գրում է «Ժողովուրդ» օրաթերթը։

Թերթի տեղեկություններով՝ Կիպրոսում հաստատվել է, որ օֆշորային փաստաթղթերի տակ դրված է Տիգրան Սարգսյանի ստորագրությունը։

«Իսկ եթե այդ ամենը հանկարծ պաշտոնապես հաստատվի, Տիգրան Սարգսյանի դիվանագիտական առաքելությունը երևի թե առկախվի, քանզի առաջ կգան քրեական պատասխանատվության խնդիրներ»,–գրում է թերթը։

Նշենք, որ օֆշորային սկանդալի մասին առաջինը գրել էր hetq.am կայքը անցյալ տարվա մայիսին։ Հրապարակման մեջ նշվում էր, որ Կիպրոսի օֆշորային ընկերություններից մեկը՝ «WLISPERA HOLDINGS LIMITED»-ը, գրանցված է եղել Տիգրան Սարգսյանի, արքեպիսկոպոս Նավասարդ Կճոյանի և գործարար Աշոտ Սուքիասյանի անունով: Այդ ընկերության միջոցով խոշոր չափերի գումար է կորզվել գործարար Փայլակ Հայրապետյանից։ Այժմ քրեական գործ է հարուցված Սուքիասյանի դեմ, նա մեղադրվում է առանձնապես խոշոր չափերով խարդախության, խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու և հանցավոր ճանապարհով ստացված առանձնապես խոշոր չափերով եկամուտներն օրինականացնելու մեջ:

Տիգրան Սարգսյանն ու Նավասարդ Կճոյանը հերքում են գործում իրենց ներգրավվածության փաստը։

Մանրամասները՝ թերթի այսօրվա համարում