Ո՞վ է վերջին շաբաթվա ընթացքում դոլար գնել․ թերթը ԿԲ֊ին առաջարկում է ցուցակ հրապարակել

ՀՀ կենտրոնական բանկի երեկ հրապարակած ամենշաբաթյա պաշտոնական տեղեկանքից այնպիսի պատկեր է ստացվում, որ հայաստանյան շուկան ներկայումս ուղղակի ողողված է կանխիկ դոլարով, գրում է «Հայկական ժամանակ» օրաթերթը:

Ըստ ԿԲ-ի հրապարակած շաբաթական ամփոփ տվյալների, անցած շաբաթվա ընթացքում մեր բանկերը շուկայից գնել են շուրջ 70 միլիոն և վաճառել ավելի քան 145 միլիոն դոլար; Համեմատության համար՝ անցած տարվա դեկտեմբերի առաջին շաբաթվա ընթացքում բանկերը գնում էին 100 միլիոն և վաճառում 107 միլիոն դոլար: Ստացվում է, որ այս շաբաթ հայաստանյան բանկերը մոտ 40 միլիոն դոլար ավել են վաճառել, քան անցած տարվա նույն ժամանակահատվածում: «ՀԺ»֊ն հարց է բարձրացնում՝ այդ ո՞վ է գնել այդքան դոլար, եթե շարքային հաճախորդները առնվազն այս շաբաթ դոլար չեն կարողացել գնել բանկերից:

«Իսկ դա նշանակում է, որ Հայաստանում կան արտոնյալ մարդիկ, ում բանկերը հաճույքով, անցած տարվա համեմատ 40 տոկոսով ավելի դոլար են վաճառել, ընդ որում՝ ցածր գնով 443 դրամով (ձեռքի վրա վաճառվում էր 470-500 դրամով): Տեխնիկապես ԿԲ-ն կարող է հրապարակել այդ արտոնյալ գնորդների անունները հատիկ առ հատիկ: Իր նկատմամբ վստահությունը վերականգնելու նկատառումներով կարելի է առաջարկել հրապարակել այդ ցանկը, եթե, իհարկե, ԿԲ-ն կռիշ չի կանգնում այդ արտոնյալներին», – նշում է թերթը։

Մանրամասները՝ թերթի այսօրվա համարում