Epress.am Լուրեր Հայաստանից
Բանակում խաղաղ պայմաններում զոհված զինվորների ծնողներն այսօր ևս մեկ նամակ են հանձնել նախագահական նստավայր՝ պահանջելով իրենց որդիների մահվան հետ կապված քրեական գործերի պատշաճ քննություն անցկացնել: Դեռևս նոյեմբերի վերջին նախագահ Սերժ Սարգսյանին ուղղած նմանատիպ նամակին ծնողները մինչ այսօր պատասխան չեն ստացել: Ծնողներին պատասխանել է միայն ՀՀ նախագահի նստավայրի քաղաքացիների ընդունելության և նամակների բաժնի ղեկավար Աիդա Ասատրյանը՝ ասելով, որ նախագահը տեղյակ է պահանջից: Գրավոր դրական կամ բացասական պատասխան ծնողները չեն ստացել: Ծնողների ևս մեկ պահանջը՝ հանդիպում Սերժ Սարգսյանի հետ, նույնպես ուժի մեջ է:
Նոր նամակում որդեկորույս ծնողները կրկին հիշեցնում են, որ Սերժ Սարգսյանը մեկ անգամ նախագահականի ճաղերի մոտ արդեն հանդիպել է ծնողներին՝ խոստանալով, որ գործերը կբացահայտվեն, սակայն այդ օրվանից և ոչ մի գործի ընթացքը չի փոխվել:
Ինչպես և նախորդ շաբաթների ընթացքում, այսօրվա ակցիայի ժամանակ ոստիկանները փորձել են թույլ չտալ, որպեսզի ծնողներն անցնեն նախագահականի դարպասի կողքով: Սակայն երբ 2010 թվականին զոհված Արթուր Ղազարյանի մայրը՝ Իրինա Ղազարյանը, դուրս է եկել Բաղրամյան պողոտայի երթևեկելի մաս, ոստիկանները ստիպված թույլ են տվել նաև մյուսներին անցնել դարպասի մոտով և ուղևորվել դեպի Նամակների և ընդունելության բաժին: