ՀՀ ԱԺ֊ն այլ երկրների խորհրդարաններին կոչ է անում ճանաչել Հայոց ցեղասպանությունը

ՀՀ Ազգային ժողովն այսօր գումարած արտահերթ նիստում 113 կողմ ձայներով ընդունել է «Հայոց ցեղասպանության 100-րդ տարելիցի կապակցությամբ» ԱԺ հայտարարությունը։

Նախագծի հեղինակների թվում են ԱԺ֊ում ներկայացված 6 խմբակցություններից 5-ի՝ «Ժառանգություն», ԲՀԿ, ՀՀԿ, ՀՅԴ, «Օրինաց երկիր» խմբակցությունների 16 պատգամավորներ։

Հայտարարության մեջ ասված է․

«Հայաստանի Հանրապետության Ազգային ժողովը`

– հիմք ընդունելով ՄԱԿ-ի Գլխավոր վեհաժողովի` 1948 թվականի դեկտեմբերի 9-ին ընդունած «Ցեղասպանության հանցագործությունը կանխարգելելու եւ պատժելու մասին» կոնվենցիան, ՀԽՍՀ Գերագույն խորհրդի` 1988 թվականի նոյեմբերի 22-ին ընդունած «Օսմանյան Թուրքիայում հայերի 1915 թ. ցեղասպանության դատապարտման մասին» օրենքը,

– արժևորելով Հայոց ցեղասպանության 100-րդ տարելիցի համահայկական հռչակագրով ամրագրված դրույթները,

– կարևորելով միջազգային հանրության հետ համատեղ ուժերով մարդկության դեմ հանցագործությունների, ցեղասպանությունների դատապարտմանը և կանխարգելմանն ուղղված ջանքերում հայ ժողովրդի ներդրումը,

– երախտագիտություն հայտնելով բոլոր պետությունների խորհրդարաններին, պետական և տեղական կառույցներին ու միջազգային կազմակերպություններին, որոնք պաշտոնապես ճանաչել են Հայոց ցեղասպանությունը, ընդունել Հայոց ցեղասպանության ժխտումը քրեականացնող օրենքներ,

կոչ է անում բոլոր երկրների խորհրդարաններին, միջխորհրդարանական և միջազգային կազմակերպություններին պաշտոնապես ճանաչել և դատապարտել Օսմանյան կայսրության իրականացրած Հայոց ցեղասպանությունը` որպես մարդկության դեմ ուղղված ծանրագույն հանցագործություն»:

Ավելի վաղ հայտարարության նախագիծը քննարկելու ընթացքում ՀԱԿ խմբակցության պատգամավոր Հրանտ Բագրատյանը կոչ էր արել հրաժարվել պահանջատիրությունից։