Epress.am Լուրեր Հայաստանից
Լոռու մարզի Շնող գյուղի բնակիչները, ինչպես նաև մի քանի բնապահպանական կազմակերպություններ վարչական հայց են ներկայացրել դատարան՝ պահանջելով պարտավորեցնել Բնապահպանության նախարարությանը ստուգումներ անցկացնել Թեղուտի հանքարդյունաբերական ծրագրերի իրականացման շուրջ: Բնապահպաններն իրենց տրամադրության տակ հիմնավոր փաստեր ունեն առ այն, որ Թեղուտի հանքի շահագործման ընթացքում «Թեղուտ» ընկերության կատարած գործողությունները բացարձակապես չեն համապատասխանում պետության կողմից տրված թույլտվություններին:
Այսօր Վարչական դատարանում Սամվել Հովակիմյանի նախագահությամբ տեղի ունեցած դատական նիստի ընթացքում Բնապահպանության նախարարության ներկայացուցիչ Խաչատուր Խաչատուրյանը կարծիք է հայտնել, որ հարցը լուծված է, քանի որ պահանջված ստուգումներն անցկացվել են ու հետագայում կասեցվել:
Հայցվորների ներկայացուցիչ փաստաբան Հայկ Ալումյանը, սակայն, չի համաձայնել, որ հարցը լուծված է: Նա միջնորդել է պարտավորեցնել վարչական մարմնին տեղեկացնել և փաստեր ներկայացնել ստուգումների մասին՝ երբ են սկսվել, ինչ փուլի են հասել, և միայն այդ տեղեկատվությունը ստանալուց հետո հայցվոր կողմը կհրաժարվի հայցից, կամ այլ միջնորդություններ կներկայացնի:
Պատասխանողը, սակայն, հրաժարվել է որևէ տեղեկություն ներկայացնել՝ ասելով, որ ստուգումները կասեցվել են Կառավարության որոշմամբ:
Դատական հայց ներկայացնելուց հետո Բնապահպանության նախարարությունն իր իսկ նախաձեռնությամբ ստուգումների հանձնարարական է տվել, որոնք պետք է անցկացվեին հունիսի 24-ից օգոստոսի 4-ը: Հուլիսի 30-ին կառավարությունը որոշում է ընդունել կասեցնել բոլոր տեսակի ստուգումները: Հայցվորներից մեկի՝ իրավաբան Արթուր Գրիգորյանի խոսքով՝ դա քաղաքական որոշում էր:
«Այսպիսիով, բնապահպանության նախարարությունը ազատվեց իր ստուգումների արդյունքները ներկայացնելու պատասխանատվությունից: Սա հերթական անգամ բովանդակային քննարկումից խուսափել էր», – ասել է Գրիգորյանը:
Հայցվորներից բնապահպան Աննա Շահնազարյանն ասել է, որ Կառավարության կողմից Բնապահպանության նախարարությունում ընթացող ստուգումները կասեցնելը միջամտություն է այդ կառույցի գործունեությանը:
Գործով վճիռը Վարչական դատարանը կայացնելու է վաղը։