Խնդիրը չլուծելու դեպքում կալանավորները Սերժ Սարգսյանին խոստանում են տասնապատկել հացադուլավորների թիվը

«Վարդաշեն» քրեակատարողական հիմնարկում իրենց պատիժը կրող դատապարտյալները բաց նամակ են ուղղել ՀՀ նախագահ Սերժ Սարգսյանին․ նրանք պահանջում են վերջ դնել Վաղաժամ ազատ արձակման անկախ հանձնաժողովի «արատավոր գործունեությանը» և լուծել կալանավորների վաղաժամկետ ազատման հարցը:

ՔԿՀ-ի կալանավորները Armtimes.com կայքին փոխանցել են բաց նամակի տեքստը, որի տակ այս պահի դրությամբ ստորագրել է թվով 88 կալանավոր:

Բաց նամակն ամբողջությամբ․

«Մեծարգո պարոն նախագահ, մենք՝ Վարդաշեն ՔԿՀ-ի դատապարտյալներս, շուրջ 100 հոգի, հույսով և հավատով դիմում ենք ձեզ որպես մեր պետության ղեկավարի եւ Սահմանադրության պաշտպանի, համոզված լինելով, որ միայն Դուք կարող եք վերջ դնել այսպես կոչված «անկախ հանձնաժողովի» արատավոր գործունեությանը, որն իրականում գործում է ոչ թե Սահմանադրությամբ և դրանից բխող օրենքներով, այլ՝ կամայական, ոչ մի բանով չարդարացված, մարդկային բարոյական բոլոր նորմերն արհամարհելով, առանց որեւէ տրամաբանության, խախտելով արդարադատության իրականացման բոլոր սկզբունքները:

Ազատազրկման վայրերում, դատապարտյալների մոտ գիտակցաբար ստեղծվում է այնպիսի բացասական բարոյահոգեբանական իրավիճակ, որը հղի է շատ անկանխատեսելի և վտանգավոր հետևանքներով: Հարգելի պարոն նախագահ, այսօր, ըստ գործող օրենքի, հարյուրավոր դատապարտյալներ իրավունք ունեն վաղաժամկետ ազատման կամ պատժատեսակի փոփոխման: Սակայն անկախ հանձնաժողովի քմահաճույքով դա տեղի չի ունենում արդեն տարիներ շարունակ, ինչի արդյունքում դատապարտյալները ստիպված դիմում են Ձեզ և ծայրահեղ քայլերի:

Այս պահին միայն «Վարդաշեն» ՔԿՀ-ում շուրջ 10 դատապարտյալ անժամկետ հացադուլ է հայտարարել՝ պահանջելով անկախ հանձնաժողովի բացասական անհիմն, ոչ պատճառաբանված որոշումները: Այդպիսի անպատասխանատու գործունեությունը հանձնաժողովի կողմից՝ կարող է հանգեցնել շատ վատ և անկանխատեսելի հետեւանքների:

Մարդիկ դատապարտված են ըստ օրենքի և իրավացիորեն պահանջում են այդ օրենքը կիրառել ամբողջությամբ, թույլ տալ նորից վերադառնալ նորմալ մարդկային կյանքի:

Հարգելի պարոն նախագահ, «Վարդաշեն» ՔԿՀ-ի բոլոր դատապարտյալներս արդարացված ենք համարում մեր ընկերների կողմից հացադուլ հայտարարելը և եթե վերջ չդրվի անկախ հանձնաժողովի կամայական գործունեությունը, ապա հնարավոր է, որ հացադուլավորների թիվը տասնապատկվի:

Մեծարգո ՀՀ նախագահ, դիմելով Ձեզ, հուսով ու հավատով սպասում ենք Ձեր կողմից այս շատ կարևոր հարցի շուտափույթ և դրական լուծմանը»:

Նշենք, որ խնդիրը լուծելու պահանջով «Վարդաշեն» ՔԿՀ֊ում կիրակի հացադուլ է սկսել պահեստազորի փոխգնդապետ, քաղբանտարկյալ Վոլոդյա Ավետիսյանը։ Երեկ նրան միացել են ևս 7 կալանավորներ։