Home / Հայաստան / Վանաձորում նախորդ տարի գրանցված գործազուրկների թիվն աճել է, աշխատանք գտածներինը՝ նվազել․ «Ասպարեզ»

Վանաձորում նախորդ տարի գրանցված գործազուրկների թիվն աճել է, աշխատանք գտածներինը՝ նվազել․ «Ասպարեզ»

2014 թվականին Զբաղվածության Վանաձորի տարածքային կենտրոնում գրանցվել են 4275 գործազուրկներ, իսկ ահա 2015 թվականին վերջիններիս թիվն աճել է շուրջ 30 տոկոսով՝ կազմելով 5558։ Այս մասին գրում է «Ասպարեզ» օրաթերթը։

Ըստ տարիքի վերլուծության պատկերը հետևյալն է․ հիմնականում աճ է գրանցվել 55-ից բարձր տարիքի և 16-19 տարեկան գործազուրկների շրջանում։

«16-19 տարեկանների առումով ենթադրելի է, որ նրանք ավելի շատ սկսել են դիմել զբաղվածության տարածքային կենտրոններ, որպեսզի կարողանան զբաղվածությանպետական ծրագրերում ներգրավվել, մասնավորապես՝ աշխատանքային պրակտիկա ծրագրում։

Իսկ 55-ից բարձր տարիք ունեցողների առումով կարող եմ ասել, որ նրանց մոտ հիմնականում հետևյալ պրոցեսն է․ մարդիկ, կորցնելով աշխատանքը, կորցրել են նաև իրենց մասնագիտությունը, որակավորումը և անհրաժեշտություն է առաջանում նոր մասնագիտություն ձեռք բերելու, որը այդ տարիքային խմբի համար այդքան էլ հարմարավետ չէ՝ նոր մասնագիտություն սովորել և տեղավորվել աշխատանքի»,- թերթի հետ զրույցում ասել է Զբվաղվածության Վանաձորի տարածքային կենտրոնի տնօրեն Արա Առաքելյանը։

Ըստ կրթության՝ վերլուծությունը ցույց է տվել, որ գործազուրկների շրջանում մեծ թիվ են կազմում հիմնականում արհեստագործական կրթություն ունեցող քաղաքացիները։ Այս տարի գործազուրկների ընդհանուր թվում վերջիններիս ներգրավվածության մակարդակը կազմել է 106 տոկոս, այսինքն՝ եթե 2014 թ․-ին գրանցված են եղել 49 գործազուրկներ, ապա այժմ արդեն գրանցված են 101 գործազուրկներ։

Ըստ սեռական պատկանելության՝ վերջին տարիներին աշխատանք փնտրողների 60-70 տոկոսը կանայք են։

Եթե Զբվաղվածության Վանաձորի տարածքային կենտրոնում ավելացել է գործազուրկների թիվը, ապա աշխատանքի տեղավորված քաղաքացիների թիվը նվազել է։ Այսպես՝ եթե 2014թ․-ին աշխատանքի է տեղավորվել 655 քաղաքացի, ապա 2015թ․-ին աշխատանք գտած քաղաքացիների թիվը կազմել է 632, այսինքն՝ մոտ 4 տոկոսի նվազում է գրանցվել։

Առաքելյանի վստահեցմամբ՝ հիմնականում աշխատանքի են տեղավորվել սպասարկման ոլորտում՝ վարսավիրանոցներ, խանութներ, ռեստորաններ, սրճարաններ և այլն, սակայն, քիչ չեն նաև բարձրագույն կրթության առկայություն պահանջող աշխատատեղերում աշխատանք գտած քաղաքացիները։

Հոդվածն ամբողջությամբ՝ թերթի այսօրվա համարում