Epress.am Լուրեր Հայաստանից
2007 թվականին բանակում ոչ մարտական պայմաններում զոհված Տիգրան Օհանջանյանի հայրը՝ Սուրեն Օհանջանյանը, 2016 թվականի հունվարի 25-ին դիմել էր Արաբկիր և Քանաքեռ-Զեյթուն վարչական շրջանների ընդհանուր իրավասության դատարան՝ բողոքարկելով իր որդու քրեական գործը քննող քննիչի և դատախազի՝ վարույթը կասեցնելու որոշումը: Այսօր դատավոր Մարինե Մելքոնյանի նախագահությամբ կայացել է գործով առաջին դատական նիստը:
Դիահերձարանում արված լուսանկարում երևում է, որ Տիգրան Օհանջանյանի ձախ ականջի վրա կան վնասվածքներ, որոնք կարող էին առաջանալ հարվածի հետևանքով, սակայն դատաբժշկագիտական փորձաքննությունը դրանք չի արձանագրել: Այս մասին այսօրվա նիստին ասել է մահացած զինվորի հայրը։
Իր բողոքին կից Օհանջանյանը դատարան է ներկայացրել վերոնշյալ լուսանկարները՝ որպես ապացույց այն բանի, որ դատաբժշկագիտական փորձաքննությունը կատարվել է թերի, և այդ լուսանկաները կարող են գործի բացահայտման համար կարևոր նշանակություն ունենալ: Պաշտոնական վարկածի համաձայն` զինվորը հոսանքահարվել է, սակայն ծնողները պնդում են, որ իրականում իրենց որդին սպանվել է։
Ի պատասխան՝ քննիչ Արսեն Մովսիսյանը (լուսանկարում` ձախից) հայտարարել է, որ այդ լուսանկարները անորակ են և որևէ ապացուցողական հիմք չեն կարող ունենալ:
«Գուցե, դրանք ոչ թե վնասվածքներ են, այլ դիակային բծեր: Ինձ չի թվում, որ էդ նկարները պետք է հետազոտել»,- ասել է Մովսիսյանը:
Դատավորը, իր հերթին, դժգոհություն է հայտնել՝ ասելով, թե ինչու պետք քննիչը պարզի, պնդի կամ ապացուցի՝ դրանք ինչ վնավածքներ են, այլ ոչ թե դատաբժիշկը:
Միայն դատավորի պահանջից հետո է քննիչը դատարանին ներկայացրել դատաբժշկագիտական փորձաքննության արդյունքները: Համաձայն փորձաքննության` լուսանկարները չեն կարող հանդիսանալ բժշկական հետազոտության օբյեկտ և չունեն ապացուցողական արժեք: Դրանք կարող են գործին կցվել որպես հարակից նյութեր:
«Էդ ինչպե՞ս է, որ փողոցում դրված բազմաթիվ տեսախցիկների նկարահանածները շատ դեպքերում կարող են հանցագործության բացահայտման հիմք դառնալ, իսկ այդ լուսանկարները՝ ոչ», – դատարանում ասել է Սուրեն Օհանջանյանը:
Վերջինս նաև միջնորդել է, որ դատարանի դահլիճ հրավիրվի վկա Արմեն Գալստյանը: Ըստ պաշտոնական վարկածի՝ Գալստյանն այն անձն է, որն առաջինն է տեսել Տիգրան Օհանջանյանին մահացած վիճակում և փորձել է բարձրացնել նրան: Փորձաքննության մեջ նշվել է, որ Գալստյանը էլեկտական լարի հետ հպումից ձեռքի այրվածք է ստացել, սակայն, Օհանջանյանի խոսքով, ինքը մի քանի օր անց տեսել է վկային, և վերջինիս ձեռքին ոչ մի այրվածք չի եղել:
Օհանջանյանի մահվան գործով դատական գործընթացի ժամանակ դատարանը մի քանի անգամ փորձել է հրավիրել Գալստյանին, սակայն, դատարանի հաղորդմանբ, նա կա՛մ ներկա չի գտնվել Հայաստանում, կա՛մ նրան չեն կարողացել գտնել, քանի որ հասցեն փոխել է, տունը վաճառել: Ըստ Օհանջանյանի, սակայն, վկան շարունակում է ապրել նույն հասցեով:
«Դատարանը, չգիտես ինչու, խուսափել է նրան բերել նիստերի դահլիճ»,- ասել է զոհված զինվորի հայրը:
Վկային դատարանի դահլիճ հրավիրելն Օհանջանյանը հիմնավորել է նրանով, որ Գալստյանը կարող է արժեքավոր տեղեկություններ տրամադրել:
Հայրը նշել է, որ առերեսումներից մեկի ժամանակ վկան պատմել էր, թե Տիգրան Օհանջանյանի դիակը հեռացնելուց հետո բռնել է նույն ալեհավաքի ամրալարը, և իրեն հետևից մոտեցած մեկ այլ մարդ է պոկել դրանից: Բայց թե ով է եղել այդ երրորդ անձը, Գալստյանը չի հիշել:
«Ո՞վ ա էդ երրորդ մարդը, որ բռնել է էդ տղային [վկա Արմեն Գալստյանի-խմբ.] հետևից: Ո՞նց կարա մեկն իր կյանքը փրկի, ու ինքը չհիշի էդ մարդուն: Թող բերեն դատարան էդ վկային, որ պարզենք՝ ինչ է իրականում եղել»,- ասել է Օհանջանյանը: Նա հարց է բարձրացրել, թե այդ դեպքում ինչպես է ամրալարը բռնած Գալստյանին հաջողվել չվնասվել:
Նշենք նաև, որ Epress.am-ի լրագրողը նախապես միջնորդություն էր ներկայացրել դատարան՝ դռնբաց նիստը տեսանկարահանելու համար: Սակայն քննիչը մերժել է միջնորդությունը՝ պատճառաբանելով, որ դեռևս պետք է ապահովել գործի գաղտնիությունը:
Դատավոր Մելքոնյանը որոշում է ընդունել մասնակի բավարարել միջնորդությունը՝ թույլ տալով նկարահանել դատական նիստի առաջին հինգ րոպեն:
Այսօրվա նիստը հետաձգվել է, որպեսզի դատարանը ծանոթանա ներկայացված փաստաթղթերին: