Բանակում ապրիլի 1-ին երկու զինծառայող է մահացել. պաշտոնական

Ապրիլի 1-ին՝ ժամը  09:00-ի սահմաններում, ՀՀ Պաշտպանության նախարարության զորամասերից մեկի  մարտական դիրքում գլխի շրջանում ստացած մահացու հրազենային վիրավորումով հայտնաբերվել է պարտադիր ժամկետային զինծառայող, շարքային Գևորգ Արմենի Ասոյանը: Այս մասին հայտնում  է ՀՀ քննչական կոմիտեն:

Թե ինչ հանգամանքներում է մահացել զինծառայողը, չի պարզաբանվում: Քննչական կոմիտեն հայտնում է, որ քննության արդյունքների մասին տեղեկություն կտրամադրվի լրացուցիչ։

Նշենք, որ այսօր ժամը 12:20-ի սահմաններում, չճանաչված Լեռնային Ղարաբաղի Հանրապետության հյուսիսային ուղղությամբ տեղակայված զորամասերից մեկի պահպանության տեղամասում հակառակորդի կողմից արձակված կրակոցից մահացու հրազենային վիրավորում է ստացել զինծառայող, 20-ամյա Վլադիմիր Աշոտի Մելքոնյանը :

Տարվա սկզբից ՀՀ և ԼՂՀ զինված ուժերի 18 զինծառայողներ են մահացել: