Ծննդկանի մահից հետո Կապանի հիվանդանոցի տնօրենին ազատել են աշխատանքից

«Կապանի բժշկական կենտրոն» ՓԲԸ տնօրեն Սմբատ Օրբելյանի պայմանագրի գործողությունը դադարեցվել է։ Այս մասին, համաձայն Սյունիքի մարզպետարանի հաղորդագրության, այսօր բժշկական կենտրոնի բուժանձնակազմի հետ հանդիպման ժամանակ հայտարարել է Սյունիքի մարզպետ Վահե Հակոբյանը։ Նրա խոսքով՝ աշխատանքից ազատման պատճառը տնօրենի կողմից իր պարտականությունները ոչ պատշաճ կատարելու փաստն է, որն արձանագրվել է ՀՀ Սյունիքի մարզպետի 2017 թվականի հունվարի 13-ի կարգադրությամբ ստեղծված հանձնաժողովի եզրակացության մեջ։ Նշենք, որ նախորդ տարվա վերջին Կապանի բժշկական կենտրոնում մահացել էր 26-ամյա ծննդկան Մարինե Իվանյանը, և վերջինիս հայրը՝ Վարդան Իվանյանը բողոք էր ներկայացրել բժիշկների դեմ։ Դեպքի առթիվ նաև քրեական գործ էր հարուցվել։

Epress.am-ի հետ զրույցում Իվանյանն ասել է, որ իր կարծիքով ոչ միայն իր դիմումի հիման վրա են ազատել Օրբելյանին։

«Էդ հիվանդանոցում էլի են նորածիններ մահացել, մեկն էլ 8 ամսական էր, այլ ծնողներ էլ են բողոքել», – մահացած ծննդկանի հայրը։

Անդրադառնալով Մարինե Իվանյանի բժշկի՝ Սամվել Միկոյանի հարցին, մեր զրուցակիցն ասել է, որ մի քանի օր առաջ ինքը հիվանդանոց է գնացել ու պահանջել, որպեսզի նրան ազատեն աշխատանքից։ Վարդան Իվանյանի խոսքով՝ Միկոյանը դեպքից հետո անհետացել էր քաղաքից, բայց հետո ինքը տեղեկացել է, որ բժիշկը վերադարձել է հիվանդանոց։

«Ասացինք, բա քրեական գործ է հարուցված, ինչի՞ է աշխատում նորից, Օրբելյանը (արդեն նախկին տնօրենը֊խմբ․) ասաց՝ ինքը չի եկել աշխատի, ուրիշ գործերով է եկել։ Ասացի՝ բա խալաթը հագած իր կաբինետում նստած է, ասաց՝ տես, դիմում կա, որ գրել է ու աշխատանքից հեռացվել է։ Ասենք, դիմումը երևի գրված էր Միկոյանի կողմից, բայց չէր մակագրվել, երևի էդ պահին գնաց, մակագրեց, որ ինքը աշխատանքից հեռացվել է», ֊ ասել է հայրը։