Զինծառայողին զորացրել են մամուլում ահազանգելուց հետո

Երևանի բնակիչ, ՀՀ ՊՆ զորամասերից մեկի զինծառայող Ավետիք Իսահակյանը 16 օր ուշացումով զորացրվել, երբ նրա հայրը՝ Իշխան Իսահակյանը «ՀԺ»-ի հետ զրույցում ահազանգել է, որ որդին ավարտել է 2 տարվա ծառայությունը, սակայն հրամանատարները թույլ չեն տալիս վերադառնալ տուն։ Վերջինիս խոսքով՝ որդուն պահանջել են իր միջոցներով վերանորոգել իրեն կցված «ԶԻԼ»-ը:

Tert.am-ի հետ զրույցում ՀՀ ՊՆ մամուլի խոսնակ Արծրուն Հովհաննիսյանն իր հերթին նշել էր, որ որևէ օրենքի խախտում չկա, որ զինծառայողի զորացրման ժամկետը երկարաձգվել է: Ինչ վերաբերում է մեքենայի վերանորոգման համար հրամանատարության կողմից պահանջած գումարին, նա նշել է, որ ոչ ոք զինծառայողին չի ստիպել իր միջոցներով վերանորոգել ՊՆ-ին պատկանող մեքենան։

«Չնայած որ նա նյութական պատասխանատվություն կրում է, բայց հարցն ընդամենը վերականգնման աշխատանքներին մասնակցելու մասին է: Եվ հետո որևէ ժամկետի խախտում չկա, մինչև մեկ ամիս իրավունք կա զինվորին պահելու, նման հրաման կա», – կայքի հետ զրույցում ասել է Հովհաննիսյանը՝ նշելով, որ չնայած այդ ամենին՝ զինվորն արդեն իսկ խնդիրը լուծել և զորացրվել է:

Այդ տեղեկությունը Armtimes.com-ի հետ զրույցում հաստատել է նաև զինծառայողի հայրը։