Տարոն Մարգարյանի հետ առնչություն ունեցող ընկերությունը «քցում» է պետությանը․ «Ժողովուրդ»

ՀՀ պաշտպանության նախարարությունն օրերս դիմել է դատարան՝ պահանջելով «Դանինի» ՍՊԸ-ից բռնագանձել 51 մլն դրամ՝ ավելի քան 105 հազար դոլար․ հայցի համար հիմք է հանդիսացել այն հանգամանքը, որ «Դանինի» ՍՊԸ-ն չի կատարել ՊՆ հանդեպ պարտավորությունները և փորձել «քցել» պետությանը, իր այսօրվա համարում գրում է «Ժողովուրդ» օրաթերթը։

Թերթն ընդգծում է, որ «Դանինի» ՍՊԸ-ն տարիներ շարունակ եղել է բյուջետային տարբեր կազմակերպությունների կարիքների համար պետական գնումների մրցույթները հաղթողների արտոնյալ շարքում:

«Սակայն ՍՊԸ-ն գրեթե միշտ մրցույթները շահել է անազնիվ եղանակով. 2013թ. Վերահսկիչ պալատը բացահայտեց, որ պետական գնումների մրցույթում հաղթած «Դանինի» ՍՊԸ-ն ապրանքները մատակարարել է շուկայականից շատ ավելի թանկ գներով, և այդպես բյուջեից մեծ գումարներ էին վատնվել:

Բայց այս պատմության մեջ ուշագրավ է մեկ այլ փաստ. «Դանինի» ՍՊԸ-ն, շրջանառվող լուրերի համաձայն, սերտ առնչություն ունի Երևանի քաղաքապետ Տարոն Մարգարյանի հետ (դեռ 2013թ. «Հայկական ժամանակ» օրաթերթն էր գրել, որ, ըստ Արդարադատության նախարարության իրավաբանական անձանց պետական ռեգիստրի գործակալության՝ «Դանինի» ընկերության հիմնադիրը Շավարշ Դանիելյանն է, որը «Ավան» ունիվերսամի տնօրեն Աղասի Դանիելյանի ազգականն է, և այդ ՍՊԸ հեռախոսահամարներն էլ «Ավան» ունիվերսամի հասցեում են գրանցված։ Իսկ ունիվերսամը պատկանում է Տարոն Մարգարյանին. նրա հայտարարագրում էլ ունեցած անշարժ գույքի մեջ նշված է նաև 820 քմ տարածքով «Ավան» առևտրի կենտրոնը): Ահա թե ինչի հետևանքով է այս ընկերությունը մշտապես շահել պետական գնումների մրցույթները: Ու հիմա Տարոն Մարգարյանի հետ առնչություն ունեցող այս «Դանինի» ՍՊԸ֊ն պարզապես քցում է պետությանը, Պաշտպանության նախարարությանը, ընդ որում՝ բավական մեծ գումարներ: Թե ո՞վ է այս ամենի անմիջական պատասխանատուն, ինքներդ կարող եք գուշակել․ երբեք բանակում չծառայած, բայց և հարմար պահի կամուֆլյաժով սելֆիներ անող Տարոն Մարգարյանն ու իր թիմակիցները, որոնք, փաստորեն, հրաժարվում են պետբյուջեին վճարել այդ 105 հազար դոլարը», ֊ գրում է թերթը։

Մանրամասները՝ թերթի այսօրվա համարում