Home / Բանտ / Արմեն Լամբարյանի մորը ՔԿՀ֊ում թույլ չեն տվել տեսակցել որդուն

Արմեն Լամբարյանի մորը ՔԿՀ֊ում թույլ չեն տվել տեսակցել որդուն

Իրավապահ մարմինները պատժում են «Սասնա ծռեր» խմբի անդամ Արմեն Լամբարյանին՝ խոչնդոտելով նրա մորն այցելել իրեն։ Այս մասին Epress.am-ի հետ զրույցում ասել է Լամբարյանի փաստաբան Արայիկ Պապիկյանը։

Ըստ դատարանի որոշման՝ հունիսի մեկից հանվել է Լամբարյանի, ինչպես նաև «Սասնա ծռեր» խմբի մյուս անդամներ Աշոտ Պետրոսյանի և Արայիկ Խանդոյանի տեսակցությունների վրա դրված արգելքը, և մոտ մեկ տարի անց նրանց հարազատները վերջապես կարող են տեսակցել նրանց։ Լամբարյանի մորը, սակայն, ով Սպիտակ քաղաքից հասել է «Դատապարտյալների հիվանդանոց» ՔԿՀ, թույլ չեն տվել տեսակցել որդուն՝ պահանջելով ցույց տալ Լամբարյանի ծննդականը համոզվելու համար, որ նրա մայրն է։

«2016 թվականի օգոստոսից, ինչ Լամբարյանը գտնվում է «Դատապարտյալների հիվանդանոցում», նրա մայրը ամեն շաբաթ այցելել է ու հիվանդանոցի բոլոր ծառայողները ճանաչել են նրան որպես Լամբարյանի մայր, որովհետև փոխանցված հանձնուքների քարտերի մեջ նշվել են Արմեն Լամբարյանի մայրիկի տվյալները։ Իսկ այսօր եկել է տեսակցության, ասել են՝ ծննդյան վկայական բեր, որ համոզվենք՝ դու Արմեն Լամբարյանի մայրն ես»,- նշել է Պապիկյանը։

Փաստաբանի խոսքով՝ նման քայլն անմարդկային խոշտանգում է Լամբարյանի և նրա հարազատների նկատմամբ։ Պապիկյանը նշել է, որ իրավապահների նման քայլից հետո կտրուկ վատացել է Լամբարյանի մոր ինքնազգացողությունը, և նրա համար ստիպված են եղել շտապօգնություն կանչել․ «Սա պատժի տեսակ է։ Լամբարյանին հետապնդում են և հենց այսպես են պատժում։ Սա ապօրինի և աղաղակող գործընթաց է, որով իրավապահները պատժում են Լամբարյանին և նրա ընտանիքին»։

Պապիկյանը նաև տեղեկացրել է, որ տվյալ խնդրի առնչությամբ ինքն արդեն դիմել է Մարդու իրավունքների պաշտպանին, սակայն այնտեղից տեղեկացրել են, որ այդ հարցում իրենք ոչնչով չեն կարող օգնել։

Հիշեցնենք, որ ամռանը «Սասնա ծռեր» խմբի կազմում ՊՊԾ գունդը գրաված Արմեն Լամբարյանին մեղադրանք է առաջադրվել ՀՀ քրեական օրենսգրքի 185-րդ հոդվածի 3-րդ մասի 1-ին կետով՝ Ուրիշի գույքը դիտավորությամբ ոչնչացնելը կամ վնասելը, որը առանձնապես խոշոր չափերի վնաս է պատճառել, 218-րդ հոդվածի 3-րդ մասի 1-ին կետով՝ կազմակերպված խմբի կողմից անձին պատանդ վերցնելը կամ պատանդ պահելը, որը կատարվել է պատանդին ազատելու պայմանով պետությանը, կազմակերպությանը կամ քաղաքացուն որևէ գործողություն կատարելուն կամ որևէ գործողություն կատարելուց ձեռնպահ մնալուն հարկադրելու նպատակով, 219-րդ հոդվածի 3-րդ մասի 1-ին կետով՝ կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը, 235-րդ հոդվածի 3-րդ մասով՝ կազմակերպված խմբի կողմից ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, 238-րդ հոդվածի 4-րդ մասի 1-ին և 2-րդ կետերով՝ 1) Կազմակերպված խմբի կողմից 2) Կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը։