Home / Կրթություն / Հատուկ դպրոցներ են հաճախում առանձնահատուկ կրթության կարիք չունեցող երեխաները․ ահազանգ

Հատուկ դպրոցներ են հաճախում առանձնահատուկ կրթության կարիք չունեցող երեխաները․ ահազանգ

Երևանի հատուկ դպրոցներում սովորող երեխաներից շատերն առանձնահատուկ կրթության կարիք չունեն։ Այս մասին այսօր լրագրողների հետ զրույցում ասել է Երևանի ավագանու «Ելք» խմբակցության անդամ Անահիտ Բախշյանը՝ նշելով, որ դպրոցի տնօրեններին ձեռնտու է շատ աշակերտներ ունենալ։

«Երևանի քաղաքապետարանի ենթակայության տակ գտնվող 3 հատուկ դպրոցներում 2017֊2018 թթ․ սովորում են 310 աշակերտներ, իսկ տարեկան պետական սուբսիդիան կազմում է 382 միլիոն 120 հազար դրամ։ Հաշվետվություններում երեխաների հատուկ կարիքների համար ծախսված գումարների մասին չկա ոչ մի բան գրված, մինչդեռ սա շատ մեծ գումար է, և արդյոք այդ գումարն իսկապես ծախսվում է նպատակային»,֊ ասել է Բախշյանը։

Նրա խոսքով՝ հիմնական դպրոցներում յուրաքանչյուր աշակերտի համար պետությունը տարեկան 125֊135 հազար դրամ է տրամադրում, մինչդեռ հատուկ դպրոցներում՝ 1 միլիոն 329 հազար դրամ։

«Ծնողները երեխաներին տանում են հատուկ դպրոց առանց մտածելու, որ իրենց երեխան վաղը ստանալու է փաստաթուղթ, որտեղ դրված է լինելու մտավոր թերզարգացում ունեցողների դպրոցի կնիք։ Իսկ տնօրենի համար յուրաքանչյուր երեխան 1 մլն դրամ է, ինչի՞ պետք է հրաժարվի»,֊ ընդգծել է ավագանու անդամը։

Բախշյանի պնդմամբ՝ նա այս խնդրի մասին խոսել է դեռ 2017֊ին, իսկ նույն տարվա նոյեմբերին ահազանգել ՄԻՊ գրասենյակ, որտեղ խոստացել են մոնիթորինգ իրականացնել, սակայն, դեռևս չեն արել։

«Հուսամ շուտով կանեն»,֊ եզրափակել է Բախշյանը։