Տարոն Մարգարյանը չի ներկայացել Երևանի ավագանու նիստին

Երևանի քաղաքապետ Տարոն Մարգարյանն այսօր չի ներկայացել ավագանու նիստին։ Ըստ փոխքաղաքապետ Կամո Արեյանի՝ նա վատառողջ է։ Հիշեցենք, որ Մարգարյանի ահռելի ունեցվածքի և հնարավոր կոռուպցիոն չարաշահումների մասին երեկ տեսանյութ է հրապարակվել, որով այժմ զբաղվում է Ազգային անվտանգության ծառայությունը։

Կամո Արեյանը, որը քաղաքապետի փոխարեն վարել է նիստը, նաև պարզաբանել է՝ ինչո՞ւ է ավագանու այսօրվա նիստի օրակարգից հանվել «Երևան» հիմնադրամին գույք նվիրաբերելու հարցը։

«Հիմնադրամի հետ կապված ԱԱԾ֊ի կողմից նախաքննության գործընթաց է իրականացվում, առգրավված են բոլոր փաստաթղթերը, բերման է ենթարկված հիմնադրամի տնօրենը, պարզ չէ՝ ով է ստորագրելու, ով է հանձնող կողմը լինելու, ժամկետները հայտնի չեն, այդ պատճառով հարցը հանվել է (ավագանու օրակարգից)»,-ասել է Արեյանը։

«Երկիր Ծիրանի» խմբակցության նախագահ Զարուհի Փոստանջյանը հորդորել է Ավագանու ՀՀԿ խմբակցությանը չդառանալ մեղսակից Տարոն Մարգարյանին, և անհապաղ սկսել Երևանի ավագանին լուծարելու գործընթաց։ Փոստանջյանն ասել է, որ հասարակությունը պահանջում է, որ Տարոն Մարգարյանը քրեական պատասխանատվության ենթարկվի՝ պաշտոնը չարաշահելով հարստանալու, քաղաքացիների ազատ արտահյատման ուղղված բռնություններ կատարելու, ընտրությունները կեղծելու և այլ հանցագործությունների համար։

«Շուրջ մեկ տարի առաջ Սերժ Սարգսյանը եկավ քաղաքապետարան և փորձեց Տարոն Մարգարյանին կարգել որպես քաղաքապետ։ Այս պահին Սերժ Սարգսյանը որպես բարձրաստիճան պաշտոնյա գոյություն չունի։ Ճիշտ է՝ դեռ չի գտնվում «Վարդաշեն» քրեակատարողական հիմնարկում, բայց դա ձեզ չպետք է կաշկանդի»,֊ ասել է Փոստանջյանը։