Epress.am Լուրեր Հայաստանից
Մինչև 30 տարեկան 107 մայրեր, որոնք դպրոցից հետո մասնագիտություն չեն ստացել, կարող են 6 ամիս ժամկետով մասնագիտական ուսուցում ստանալ անմիջապես գործատուի մոտ։
Այս մասին Epress.am-ի հետ զրույցում ասել է Աշխատանքի և սոցիալական հարցերի նախարարի առաջին տեղակալ Գեմաֆին Գասպարյանը։
Ծրագրով նախատեսվում է աշխատաշուկայում անմրցունակ և մասնագիտություն չունեցող երիտասարդ մայրերի աշխատանքային ունակությունների ու կարողությունների ձեռքբերման հնարավորությունների ընձեռնման նպատակով գործատուի մոտ կազմակերպել մինչև վեց ամիս տևողությամբ մասնագիտական ուսուցում:
Ծրագրի համաձայն՝ երիտասարդ մայրերին, մասնագիտական ուսուցում ստանալու ընթացքում կտրվի նաև 6-ամսյա կրթաթոշակ՝ նվազագույն ամսական աշխատավարձի չափով: Նախապատվություն կտրվի նրանց, ովքեր ունեն երեք և ավելի երեխա, համարվում են միայնակ մայր, նրանց ընտանիքը ստանում է ընտանեկան կամ սոցիալական նպաստ:
Այս ծրագիրն իրագործվել էր նաև անցած տարի։ 2018 թվականին նախապես որոշված 100 կանանց փոխարեն, բյուջի վերաբաշխման շնորհիվ, ծրագրից օգտվել են 112 կանայք։
2019 թվականին նախատեսվում է 107 կանանց ապահովել անվճար ուսուցմամբ։ Չնայած փոխնախարարը չի բացառում, որ հնարավոր է ավելի շատ կանայք հնարավորություն ստանան օգտվել այդ ծրագրից։
Այս տարվա համար նախատեսված ընդհանուր բյուջեն կազմում է 63 միլիոն 556 հազար դրամ։