«Վայել չէ փողով նախագահ ընտրելը»․ Ստեփանակերտում կրկին բերման ենթարկվածներ կան

«Քանի դեռ Բակո Սահակյանն իշխանության գլխին է, ընտրություններն անիմաստ են։ Բակո Սահակյանը վարչական ռեսուրսներն օգտագործելու է ի օգութ Արայիկ Հարությունյանի, որպեսզի իրենք կարողանան ապահովել իրենց հանցագործ, թալանչի, կոռումպացված համակարգը», – հայտարարել էր «Արցախի հեղափոխական կուսակցության» նախագահ Արթուր Օսիպյանը։

Փետրվարի 24-ին Ստեփանակերտում հերթական անգամ բերման են ենթարկել բողոքի ակցիայի մասնակիցներին։ Իսկ մինչ այդ հրաժարականների և արդար ընտրությունների պահանջով անցկացվող ակցիայի մասնակից Արթուր Օսիպյանը կոչ էր անում «ո՛չ» ասել նախկին վարչապետ և նախագահի թեկնածու Արայիկ Հարությունյանին, կոռումպացված ռեժիմի վերարտադրմանը, սուտասաններին և ընտրակաշառքներին։

https://www.facebook.com/Artsakh1.am/videos/2533160576939872/

«Հարգելի հայրենակիցնե՛ր, մեզ վայել չէ փողով նախագահ ընտրելը, փողով իշխանություն ձևավորելը, դրա վերջը լավ չի լինելու, ֊ Artsakh1.am֊ի կողմից տարածված տեսանյությում ասում էր Օսիպյանը՝ հորդորելով մարդկանց իրենց երեխաների ապագան չվստահել «թալանչի Հարությունյանին»։ ֊ Ուստի հանուն արդար ընտրությունների պահանջում ենք Բակո Սահակյանի, Լևոն Մնացականյանի, Արշավիր Ղարամյանի հրաժարականները»։

Դիմելով ոստիկաններին, ընդդիմադիրը նշեց, որ պայքարը նաև իրենց համար է, և խնդրեց օգնել, ոչ թե խանգարել․ «Ծառայե՛ք ձեր ժողովրդին ու ձեր պատիվը լինելու է ավելի բարձր։ Բոլորիս կողմից լինելու եք հարգված»։

Ավելի ուշ, սակայն, ուժայինները կրկին բերման ենթարկեցին ցուցարարներին։

«Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանը խիստ մտահոգիչ է համարում Ղարաբաղում խաղաղ ցուցարարներին բերման ենթարկելու դեպքերը․ «Խիստ մտահոգիչ է դառնում Արցախում խաղաղ ցուցարարներին բերման ենթարկելու դեպքերի պարբերական բնույթը: Նման միջադեպերով չպիտի ստվերվեն Արցախում ժողովրդավարության զարգացմանն ուղղված ջանքերը»։

Նշենք, որ ՀՀ կառավարությունն առաջին անգամ ֆինանսավորում է հայաստանյան հասարակական կազմակերպությունների կողմից Ղարաբաղում դիտորդական առաքելություն իրականացնելը։ Առաքելությունն իրականացնելու են «Իրազեկ քաղաքացիների միավորում» և «Թրանսփարենսի ինթերնեշնըլ հակակոռուպցիոն կենտրոն» հ/կ-ները։