Epress.am Լուրեր Հայաստանից
Չնայած նրան, որ ռեկտոր դառնալու համար դոկտորի գիտական աստիճանը պարտադիր պայման է, Տնտեսագիտական համալսարանի ռեկտորի պաշտոնում այսօր ընտրվեց Դիանա Գալոյանը:
Բուհի ռեկտորի նախկին պաշտոնակատարի օգտին քվեարկել են խորհրդի 22 անդամներ: Եվրոպական համալսարանի ուսումնագիտական գծով պրոռեկտոր Տիգրան Մարտիրոսյանն ստացել է 3 քվե: Բոլորին դեմ են քվեարկել Խորհրդի անդամներից 2-ը:
Նիստին մասնակցել է կառավարման խորհրդի 32 անդամների 26-ը:
Մինչդեռ համալսարանում ռեկտորի թափուր պաշտոնի մրցույթ էր անցկացվում, Բարձրագույն որակավորման կոմիտեի նույն օրվա որոշմամբ անվավեր է ճանաչվել Դիանա Գալոյանին տնտեսագիտության դոկտորի գիտական աստիճան շնորհելու մասին 2015 թվականի հրամանը:
ԲՈԿ նախագահ Սմբատ Գոգյանի խոսքով՝ «Վարչարարության մասին» օրենքի համաձայն՝ որոշումն ուժի մեջ է մտնում հրապարակման հաջորդ օրվանից, այսինքն՝ Գալոյանը դեռ գիտությունների դոկտոր է։
«Վաղն էլ չի լինի», – Epress.am-ի հետ զրույցում ասաց Գոգյանը՝ կարծիք հայտնելով, որ ռեկտորը կբողոքարկի ու ժամանակավոր կկասեցնի ԲՈԿ-ի որոշումը։
«Գալոյանը կարող է դիմել նախարարին վարույթ հարուցելու հարցով, ինչի արդյունքում որոշումը կարող է ժամանակավորապես կասեցվել»։ Հարցին, թե այդ դեպքում ինչպիսի՞ քայլեր կձեռնարկվեն, զրուցակիցը պատասխանեց․ «Կապրենք, կտեսնենք»։