Home / Եկեղեցի / «Նախկինում եկեղեցին նման մտահոգություն չուներ»․ քահանաները հստակեցրեցին դիրքորոշումը

«Նախկինում եկեղեցին նման մտահոգություն չուներ»․ քահանաները հստակեցրեցին դիրքորոշումը

Ընդդիմության մայիսի 1-ին տեղի ունենալիք հանրահավաքին ընդառաջ մամուլում տեղեկություն էր տարածվել այն մասին, որ միջոցառմանը մեծաթիվ քահանաներ են ներկա լինելու։ Այսօր լուրը պաշտոնապես հաստատվեց։

Ընդդիմության այսօրվա հանրահավաքին մասնակցելու մտադրության մասին հայտնել է Մայր Աթոռը՝ նշելով, որ հոգևորականները ներկա են լինելու հանրահավաքին՝ «հնարավոր լարվածությունները մեղմելու և հանդարտության մթնոլորտի պահպանմանը նպաստելու համար»։

Հայտարարությանը անդրադարձել է իրավապաշտպան Արթուր Սաքունցը․

«Մինչև 2018թ. մայիսը ընդդիմության որևէ հանրահավաքին, էլ չասեմ 2008թ մարտի 1-ին և դրանից առաջ չկար նման մտահոգություն, ունենալով առավել քան բավարար հիմքեր մտահոգության… Ուղղակի արձանագրում»։

Մայր Աթոռի տեղեկատվական կենտրոնի պատասխանատու տեր Եսայի քահանանի տարածած հաղորդագրության մեջ նշվում է․

– Մայիսի 1-ին, Երևանում նախատեսված հանրահավաքին հոգևորականների մասնակցության վերաբերյալ լրատվականների հարցերին ի պատասխան ցանկանում եմ ընդհանրացված տեղեկացնել հետևյալը։

Հոգևորականները, ինչպես քաղաքական զանգվածային նախընթաց միջոցառումներին, ներկա են լինելու նաև այսօրվա հանրահավաքին՝ հնարավոր լարվածությունները մեղմելու և հանդարտության մթնոլորտի պահպանմանը նպաստելու համար:

Մայր Աթոռը հորդորում է հանրահավաքի մասնակիցներին և իրավապահ մարմինների ներկայացուցիչներին հանդես բերել զգոնություն ու խիստ պատասխանատվություն և զերծ մնալ սադրանքներին տրվելուց:

Աղոթում ենք Հայաստան և Արցախ մեր հայրենիքի ապահովության ու անվտանգության, մեր ժողովրդի բարօր կյանքի համար։

Իշխանական մամուլը երեկվանից գրում է, որ ընդդիմությունն իր ցույցին քահանաների է հրավիրելու, «նրանց թիկունքում թաքնված, բախումներ է հրահրելու ոստիկանության հետ՝ փորձելով նոր «Մարտի 1» կազմակերպել»։

շապիկի լուսանկարը՝ Կարեն Օհանյանի