Home / Բանակ / Ժամկետայինի դին հայտնաբերվել է ծառից կախված վիճակում․ ՔԿ

Ժամկետայինի դին հայտնաբերվել է ծառից կախված վիճակում․ ՔԿ

Մարտի 8-ին հայտնաբերվել է ՊՆ N զորամասի զինծառայող Անդրանիկ Կարոյի Օհանյանի մարմինը, այսօր առավոտյան հաղորդել էր Պաշտպանության նախարարությունը։

Քննչական կոմիտեն, իր հերթին, հայտնում է, որ պարտադիր ժամկետային զինծառայող Անդրանիկ Կարոյի Օհանյանի դին հայտնաբերվել է զինավանի հավաքակայանի հարակից անտառում՝ ծառից կախված վիճակում։

«Նշանակվել է դիակի դատաբժշկական փորձաքննություն, հարցաքննվել են զորամասի մի շարք զինծառայողներ՝ ինչպես սպայական կազմից, այնպես էլ համածառայակիցներ», – ասվում է ՔԿ հաղորդագրության մեջ։

Դեպքի առթիվ նախաձեռնվել է քրեական վարույթ ՔՕ 522-րդ հոդվածի 1-ին մասի (Զորամասում կամ զինվորական ծառայություն կրելու այլ վայրում զինծառայողին սպառնալիքի, դաժան վերաբերմունքի կամ անձնական պատիվն ու արժանապատվությունը նվաստացնելու միջոցով անզգուշությամբ ինքնասպանության կամ ինքնասպանության փորձի հասցնելը) հատկանիշներով․ կատարվում է նախաքննություն: