Կարապետյաններն այլևս չեն ֆինանսավորում Սևանի զինանոցը

Կառավարության վերջին նիստով ավելի քան 79 մլն 300 հազար դրամ է տրվել Սևանի թերակղզում գտնվող նախագահական ամառանոցում ԱԱԾ ՊՊԾ զինանոց կառուցելու համար, գրում է «Ժողովուրդ» օրաթերթը:

Թերթը նշում է, որ այս տարվա հուլիսին էլ, կառավարության N 918-Ն որոշման համաձայն, ամառանոցի հիմնանորոգման աշխատանքների համար տրվել է 140 մլն դրամ, մինչդեռ քաղաքական շրջանակներում գրեթե բոլորին է հայտնի, որ ամառանոցում կապիտալ շինարարությունն իրականացվել է Սերժ Սարգսյանի աշխատակազմի նախկին ղեկավար Կարեն Կարապետյանի եղբոր` Սամվել Կարապետյանի` Կալուգայի Սամոյի ֆինանսական միջոցներով:

«Հավանաբար Կարեն Կարապետյանի հրաժարականից հետո եղբայրը դադարեցրել է ֆինանսավորումը, ու հիմա զինանոցի աշխատանքներն ավարտին են հասցվում արդեն բյուջետային միջոցներով: Ստացվում է, որ մի կողմից պետական բյուջեից ամառանոցի անվան տակ գումարներ են դուրս գրվել ու անհետացել, մյուս կողմից Սամվել Կարապետյանի գումարներն են ծախսվել այնտեղ»,- եզրակացնում է «Ժողովուրդը»: