Epress.am Լուրեր Հայաստանից
«Չկա պարոն Զոլյանը, չկանք մենք»: Այս կարգախոսն էին որդեգրել այսօր Երևանի Վ. Բրյուսովի անվան պետական լեզվաբանական համալսարանի բակում Կրթության և գիտության նախարար Արմեն Աշոտյանի` բուհի ռեկտոր Սուրեն Զոլյանին աշխատանքից ազատելու որոշման դեմ բողոքի ակցիա կազմակերպած մի խումբ ուսանողներ:
Ինչպես տեղից հաղորդում է Epress.am-ի թղթակիցը, ակցիայի մասնակիցները համոզմունք են հայտնել, որ միակ ոչ ՀՀԿ-ական ռեկտոր Սուրեն Զոլյանին լիազորություններից զրկելը քաղաքական դրդապատճառներ ունի, քանի որ «եթե ընտրությունները չլինեին, նման բան չէր լինի»:
Ակցիայի մասնակիցներից Միքայելը որպես որոշման քաղաքական շարժառիթների ապացույց բերեց այն փաստը, որ ՀՀԿ-ական Հասմիկ Ափյանի գլխավորած ԵՊԼՀ-ի ուսանողական խորհուրդը չի մասնակցում ակցիային և ինքը` Հասմիկը, շատ պասիվ է իրեն պահում:
«Այն փաստը, որը Հասմիկը չկա, վկայում է նրա քաղաքական դիրքորոշման մասին», – ասել է Միքայելը:
Ուսանողները սկսել են պահանջել, որ Հասմիկ Ափյանը ներկայանա և մասնակցի ի պաշտպանություն ռեկտորի անցկացվող բողոքի ակցիաներին:
Հավաքվածները նշել են, որ իրենք ենթարկվում են ռեկտորի հրամանին, ով կարգադրել է դասերը շարունակել բնականոն հունով, և Կրթության և գիտության նախարարության դեմ բողոքի ակցիա կանցկացնեն դասերի ավարտից հետո:
Ուսանողները պահանջելու են ՀՀԿ-ական նախարար Արմեն Աշոտյանի հրաժարականը:
Նշենք նաև, որ ստեղծված իրավիճակը հաշվի առնելով` Սուրեն Զոլյանը չեղյալ է հայտարարել ապրիլի 18-20-ը ներառյալ իր գործուղումը Գերմանիա, որտեղ նա պետք է գիտաժողովի մասնակցեր: