Epress.am Լուրեր Հայաստանից
ՀՀ նախկին վարչապետ, ԱԺ ՀԱԿ խմբակցության անդամ Հրանտ Բագրատյանը պատրաստվում է առաջադրել իր թեկնածությունը 2013թ. կայանալիք նախագահական ընտրություններում, գրում է «168 ժամ» պարբերականը՝ հղում կատարելով իր աղբյուրների վրա։
«Բագրատյանն այդ քայլին չի դիմի միայն մի դեպքում՝ եթե ՀԱԿ առաջնորդ Լևոն Տեր-Պետրոսյանն առաջադրի իր թեկնածությունը։ Սակայն, ըստ մեր աղբյուրների, Բագրատյանն իր մտադրությունից չի հրաժարվի, եթե Տեր-Պետրոսյանի փոխարեն ՀԱԿ-ից առաջադրվի մեկ այլ թեկնածու, ասենք, Լևոն Զուրաբյանը, կամ Կոնգրեսը որոշի պաշտպանել ԲՀԿ նախագահ Գագիկ Ծառուկյանին։ Բագրատյանը որպես իր գաղափարակիցներ տեսնում է ՀԱԿ այն գործիչներին, ովքեր դեմ են ՀԱԿ-ԲՀԿ համագործակցությանը։ Եթե Հրանտ Բագրատյանն իսկապես առաջադրի իր թեկնածությունը, ապա դա կհանգեցնի ՀԱԿ-ի հերթական, գուցե նաև վերջնական պառակտմանը, որը կարող է հանգեցնել քաղաքական իրականությունից այդ կառույցի վերջնական դուրսմղմանը», – գրում է պարբերականը։
Թերթը նշում է նաև, որ Բագրատյանն այս մասին հրաժարվում է հրապարակայնորեն խոսել, սակայն իր մտադրությունների մասին բաց և անկեղծ խոսում է ՀԱԿ անդամ պատգամավորների և այլ քաղաքական ուժերի ներկայացուցիչների հետ: