Րաֆֆի Հովհաննիսյանը թույլ չի տալու պահի տակ որոշումներ կայացնել. նախագահականը չի գրոհելու

Րաֆֆի Հովհաննիսյանը չի պատրաստվում գրոհել Նախագահական նստավայրը, քանի որ գրոհելը այս իշխանությունների որդեգրած քաղաքականությունն է: Այս մասին նա ասել է այսօր Ազատության հրապարակից մեկնարկած երթի ժամանակ: Ըստ «Ժառանգության»՝ Երևանի քաղաքապետարան ներկայացրած հայցի՝ երթը պետք է անցներ Ազատության հրապարակ-Հյուսիսային պողոտա-Աբովյան փողոց-Հանրապետության հրապարակ-Վ.Սարգսյան փողոց-Գ. Լուսավորիչ փողոց-Հ.Պարոնյան փողոց-Պռոշյան փողոց-Մ.Բաղրամյան պողոտա-Ամիրյան փողոց-Հանրապետության հրապարակ երթուղով: Քաղաքապետարանը, սակայն, առաջարկել էր փոխել երթի ուղին՝ նշելով, որ Բաղրամյան 26 հասցեում գտնվող նախագահական նստավայրում նախատեսված են բազմաթիվ արարողակարգային միջոցառումներ և հանդիպումներ արտասահմանյան պատվիրակությունների ղեկավարների հետ, հետևաբար, «իրազեկման մեջ նշված երթուղով երթի անցկացումը կարող է էական դժվարություններ ստեղծել արարողակարգային միջոցառումների իրականացմանը»:

Րաֆֆի Հովհաննիսյանը երթի ժամանակ նշել է, որ որևէ հակասահմանադրական քայլի չի գնալու և թույլ չի տալու պահի տակ որոշում կայացնել: Նրա խոսքով՝ այն, որ իշխանությունները արգելեցին երթը կազմակերպել Բաղրամյան պողոտայով, վկայում է, որ Սերժ Սարգսյանը վախեցած է: Ընդդիմության առաջնորդի խոսքով՝ ինքը կցանկանար նախագահական նստավայրի կողքով անցնելիս մտնել և «մի երկու խոսք ասել»:

Հասնելով Մյասնիկյանի արձանի մոտ՝ Րաֆֆի Հովհաննիսյանը ծաղիկներ դրեց 2008թ. մարտի 1-ի զոհերի հիշատակին և ծնկի իջավ՝ իր այս քայլովընդգծելով, որ երբեք թույլ չի տալու, որ որևէ մեկի արյունը թափվի: Մյասնիկյանի արձանի մոտ եկած Մարտի 1-ի զոհերից մեկի մոր հետ ողջագուրվելուց հետո Հովհաննիսյանը հայտարարեց. «Այլևս երբեք»:

Երթի ընթացքում Րաֆֆի Հովհաննիսյանին ուղեկցող մարդիկ շարունակ վանկարկում էին «Րաֆֆի, նախագահ»:

Այս պահին Րաֆֆի Հովհաննիսյանի երթը շարունակվում է: