Թանկացման հետևանքով ՀԷՑ֊ը հայաստանցիներից տարեկան 36.7 միլիարդ ավել գումար կստանա

Հայաստանցիների վրա 6.93 դրամով էլեկտրաէներգիայի թանկացումը ընդհանուր առմամբ նստելու է տարեկան 36.7 միլիարդ դրամ։ Այս մասին նշված է «Իրազեկ քաղաքացիների միավորում» հասարակական կազմակերպության տարածած հաղորդագրության մեջ։ 

ՀԿ֊ն, վերլուծելով «Հայաստանի էլեկտրական ցանցեր» ընկերության հաշվետվությունները, պարզել է, որ սպառվող էլեկտրաէներգիայի քանակի անփոփոխ մնալու դեպքում յուրաքանչյուր ընտանիք (բնակիչ-բաժանորդ) թանկացման արդյունքում պետք է ՀԷՑ-ին տարեկան միջինը 30 հազար դրամ ավել վճարի։

Բացի դա, «Իրազեկ քաղաքացիների միավորումը» ընդգծում է, որ 7-դրամանոց թանկացման հետևանքով ՀՀ յուրաքանչյուր ընտանիք ընդհանուր առմամբ տարեկան շուրջ 80 հազար դրամի հավելյալ ֆինանսական բեռ կունենա, որը կարտահայտվի գնաճի, հարկերից վճարվող բյուջետային միջոցների հավելյալ ծախսի տեսքով։

Սպառող սեգմենտը	Տարեկան սպառումը (մլն կՎտ/ժ)	Տարբերությունը (մլրդ դրամ)
Բնակչություն	1874.9	12.993
Բյուջետային կազմակերպություններ	226.9	1.5724
Արդյունաբերություն	1284.5	8.901
Տրանսպորտ	113.2	0.7845
Ոռոգում	172.7	1.1968
Ջրամատակարարում և ջրահեռացում	71.4	0.495
Այլ կազմակերպություններ	1560.0	10.81
ԸՆԴԱՄԵՆԸ	5303.6	36.753

 

Հիշեցնենք, որ Հանրային ծառայությունները կարգավորող հանձնաժողովը հունիսի 17-ին որոշում է կայացրել էլեկտրաէներգիայի 1 կվ/ժ ցերակային սակագինը բարձրացնել 6.93 դրամով։ Թանկացումից հետո 1 կիլովատը կազմում է 48.78 դրամ։