Թուրքական ֆիլմերի փառատոնն արգելեցին «միասեռականի» պատճառո՞վ

«23,5» անունը կրող թուրքական ֆիլմերի փառատոնը, որն այս տավա մարտին «ֆուտբոլային դիվանագիտության» ալիքի ներքո անցավ Երևանում,  չի հաջողվել անցկացնել Վանաձորում: Այն պետք է կայանար դեկտեմբերի 10-ին Վանաձորի Շառլ Ազնավուրի անվան մշակույթի պալատի տեսասրահում, իսկ դեկտեմբերի 11-ին` քաղաքի Տիկնիկային թատրոնում: Տարածքների վարձակալության մասին պայմանագրերը կնքելուց հետո նոյեմբերի 29-ից կազմակերպչիները սկսել էին բաժանել հրավիրատոմսերը:

Դեկտեմբերի 8-ին Տիկնիկային թատրոնի տնօրեն Ս.Մելիքյանը փառատոնի Վանաձորի համակարգող Համլետ Գյուլզադյանին հայտնել է, որ թատրոնում  ցուցադրությունը չի կայանա` խորհուրդ տալով դիմել քաղաքապետարան բացատրություններ ստանալու համար:

Քաղաքապետի տեղակալ Նորիկ Սարդարյանը հայտնել է, որ թեև կազմակերպիչները մարդասիրական գործունեությամբ են զբաղվում, փառատոնը Վանաձորում չի կայանալու:

Թուրքական ֆիլմերի փառատոնի տնօրեն, իրավապաշտպան Գեորգի Վանյանը Քաղաքապետարանի դիրքորոշման և վարձակալության պայմանագրերի միակողմանի խզման վերաբերյալ գրավոր բացատրություն է պահանջել:

Սարդարյանը պատասխանել է, որ Վանաձորում փառատոնը չի կայանա, որովհետև ինքն այդպես է ցանկանում: Նա առաջարկել է նամակով դիմել և սպասել պատասխանի:

Տիկնիկային թատրոնի տնօրենը նույնպես հաստատել է պայմանագրի միակողմանի խզման փաստը: Մշակույթի տան տնօրեն Արտյոմ Գուլինյանից կազմակերպիչներին հաջողվել է ստանալ վարձակալության պայմանգրի` ուժի մեջ լինելու մասին հաստատում, սակայն դեկտեմբերի 10-ին` փառատոնի մեկնարկից մեկ ժամ առաջ, նա հայտարարել է, որ չի կարողանա բացել տեսասրահի դռները:  

Միևնույն ժամանակ Մշակույթի պալատի մոտ սկսել են հանդիսատեսներ հավաքվել: Պալատի աշխատակիցներին կարգադրել են ոչ մեկին վերև` տեսասրահի մոտ չթողնել: Գեորգի Վանյանին հաջողվել է հասնել նրան, որ հանդիսատեսներին թույլ են տվել սպասել Մշակույթի պալատի սրճարանում` մինչև խնդիրը լուծվի: Միևնույն ժամանակ, քաղաքային դատախազության երկու աշխատակիցներ վերև են բարձրացել:

15:00-ին հանդիսատեսները շատացել են, նրանք չեն տեղավորվել սրճարանում և սկսել են կուտակվել նախասրահում: 20 րոպե սպասելուց հետո վարձակալության պայմանագիրը կյանքի կոչելու բոլոր փորձերը սպառվել են, և Վանյանը հայտարարել է, որ փառատոնը չի կայանա:

Ամեն դեպքում, նա ներածական խոսք է ասել, միացրել է իր շարժական համակարգիչը և միացրել ֆիլմերը: Բնականաբար, մոտ 100 հանդիսատեսներից շատերը հնարավորություն չեն ունեցել դիտել ֆիլմերը փոքր էկրանով: Նրանից շատերը հեռանալիս խնդրել են իրենց տրամադրել ֆիլմերի տեսագրությունը:

Սրճարանում են մնացել ամենահամառ 7 հանդիսատեսները` հիմնականում Թատերական ակադեմիայի Վանաձորի մասնաճյուղի ռեժիսուրայի բաժնի ուսանողները: Նրանք սպասել են, որ բոլոր հեռանան, և նոութբուքով դիտել են բոլոր տասը ֆիլմերը:

Հետագայում Վանաձորի քաղաքապետի տեղակալ Սարդարյանն ասել է, որ իրենից ոչ ոք թույլտվություն չի խնդրել, որպեսզի ինքն արգելի կամ չարգելի փառատոնը:
Նրա խոսքով` իրենից միայն կարծիք են հարցրել, և ինքը նշել է, որ նման փառատոնը տեղին չէ, դա «գրանտակերություն է»:

Սարդարյանի համոզմամբ` եթե քաղաքի հաստատությունների տնօրեններն իր կարծիքը լսել են, ապա ինքը ողջունում է նրանց որոշումը:

«Իմ կարծիքն այն է, որ Տիկնիկային թատրոնը քաղաքական ֆիլմերի ցուցադրման վայր չէ», – ասել է քաղաքապետի տեղակալը: Նա ասել է, որ անձամբ ոչ մեկին չի հրամայել թույլ չտալ ֆիլմերի ցուցադրությունը և «վերևից ոչ մի կարգադրություն» չի ստացել: Սարդարյանի խոսքով` Վանյանն իր մոտ է մտել մի տղայի հետ, ով միասեռական է, «նման մարդկանց ինքն անգամ չի բարևում»:

«Նման մարդիկ հավաքվել են, և ցանկանում են ինչ-որ բան ցույց տալ, ինչպես կարելի է դա թույլ տալ», – ասել է Սարդարյանը: